🌹 “ഇന്നത്തെ ചിന്താവിഷയം” 🌹 – 2024 | ഒക്ടോബർ 25 | വെള്ളി ✍ പ്രൊഫസ്സർ എ.വി. ഇട്ടി മാവേലിക്കര

സ്നേഹിക്കാനും സ്നേഹം തിരിച്ചറിയാനും ആകട്ടെ
————————————————————————-

ജോലി കഴിഞ്ഞു വീട്ടിലെത്തിയ അമ്മയോടു മൂത്ത മകൾ പരാതി പറഞ്ഞു: “അനിയത്തിക്കുട്ടി, ഭിത്തി മുഴുവൻ കുത്തിവരച്ചിട്ടിരിക്കുന്നു!” കുട്ടിയെ അടിക്കാൻ തുടങ്ങിയ അമ്മ, പെട്ടെന്ന് ഭിത്തിയിൽ ശ്രദ്ധിച്ചു. എല്ലാ വരകൾക്കും ഒരേ രീതി. ഒന്നുകൂടി സൂക്ഷിച്ചു നോക്കിയപ്പോൾ, കൊച്ചുമകൾ എഴുതിയതു മുഴുവൻ അമ്മയ്ക്കു വായിക്കാൻ കഴിഞ്ഞു:
“I love you Amma” എന്നായിരുന്നു അത് ! കുഞ്ഞിൻ്റെ കണ്ണുകൾ പേടിയാലും, അമ്മയുടെ കണ്ണുകൾ, സന്തോഷത്താലും നിറഞ്ഞു!

നാമെല്ലാം പരസ്പരം പറയാൻ ശ്രമിക്കുന്നത് ഒന്നു തന്നെ: “എനിക്കു താങ്കളെ ഇഷ്ടമാണ്; ഞാൻ നിങ്ങളെ സ്നേഹിക്കുന്നു”. പക്ഷെ, പലരും അതു പ്രകടിപ്പിക്കുന്ന രീതികൾ വ്യത്യസ്തങ്ങളാകാം. സ്വന്തം ധാരണകൾക്കും പ്രതീക്ഷകൾക്കു മനുസരിച്ചു മാത്രം മറ്റുള്ളവരെ വ്യാഖ്യാനിക്കുക്കുകയും, അവരുടെ പ്രവൃത്തികളെ വിലയിരുത്തുകയും ചെയ്യുമ്പോൾ നാം നഷ്ടപ്പെടുത്തുന്നത് സൗഹൃദങ്ങളും, ബന്ധങ്ങളിലെ മനോഹാരിതയുമാണ്. തിരിച്ചറിയാനാവാത്ത വൈവിദ്ധ്യ ഭാവങ്ങളാണ് സ്നേഹത്തിൻ്റെ പ്രത്യേകത. സ്നേഹത്തിൻ്റെ എല്ലാ വകഭേദങ്ങളും, വിശദമാക്കുന്ന ഏതെങ്കിലും നിഘണ്ടു ഉണ്ടാകുമോ ലോകത്തിൽ? സംശയമാണ്.

ഹൃദയവും തലച്ചോറും തമ്മിലുള്ള മത്സരത്തിൽ, ഹൃദയം ജയിക്കുന്നതാണു നല്ലത് ! അറിവ് , എല്ലാറ്റിനുമുളള ഒറ്റമൂലിയല്ല. അനുഭവങ്ങളും, അനുഭൂതികളുമാണ് സൗഹൃദങ്ങൾക്കു സ്ഥിരത നൽകുന്നത്. “ഓർമ്മിച്ചിരിക്കാൻ എന്തെങ്കിലും സമ്മാനിച്ചിട്ടു പോകുന്നവർ”, ഹൃദയം കൈമാറിയവരാണ്. മറ്റുള്ളവരുടെ പല പ്രവൃത്തികളും നമ്മെ പടുത്തുയർത്താൻ വേണ്ടിയായിരുന്നുവെന്നു തിരിച്ചറിയുന്നത്, ഹൃദയത്തിനു തലച്ചോറിനെ കീഴടക്കാൻ കഴിയുമ്പോൾ മാത്രമാണ് ! അന്യരിലെ പൊരുത്തക്കേടുകളോടു പൊരുത്തപ്പെടാൻ കഴിയുന്നവർക്കു മാത്രമേ സ്നേഹിക്കാൻ കഴിയൂ; സ്നേഹം തിരിച്ചറിയാനും.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര