🌹 “ഇന്നത്തെ ചിന്താവിഷയം” 🌹 – 2024 | സെപ്റ്റംബർ 15 | ഞായർ ✍ പ്രൊഫസ്സർ എ.വി. ഇട്ടി മാവേലിക്കര

മാറ്റിനിർത്തപ്പെടാൻ ആകാത്ത മികവു നേടാം
————————————————————————–

മോണിംഗ് ഗ്ലോറി എന്ന പുഷ്പം, ജപ്പാൻകാർ ഏറെ ഇഷ്ടപ്പെട്ടിരുന്നു. അതാൽ നിറയപ്പെട്ട തൻ്റെ ഗുരുവിൻ്റെ പൂന്തോട്ടത്തേക്കുറിച്ച് ശിഷ്യൻ രാജാവിനോടു പറഞ്ഞു: “ഗുരുവിൻ്റെ പൂന്തോട്ടം മുഴുവൻ മോണിംഗ് ഗ്ലോറി പൂക്കളാണ്. അവയുടെ സുഗന്ധവും നിറവും ഒന്നു വേറേ തന്നെ. അങ്ങു പോയി അതു കാണണം”. നൂറു കണക്കിനാളുകൾ ‘ പണിയെടുക്കുന്ന, ഏക്കറുകൾ വ്യാപിച്ചുകിടക്കുന്ന പൂന്തോട്ടമുള്ള രാജാവിന് സന്യാസിയുടെ പൂന്തോട്ടം കാണാൻ മടിയായിരുന്നുവെങ്കിലും അദ്ദേഹം സമ്മതിച്ചു. രാജസന്ദർശനത്തേക്കുറിച്ച്, ശിഷ്യൻ ഗുരുവിന് അറിയിപ്പും നൽകി. പിറ്റേന്നു പൂന്തോട്ടം കാണാനെത്തിയ രാജാവും പരിവാരങ്ങളും സ്തംഭിച്ചു പോയി. അവിടെ മോണിംഗ് ഗ്ലോറി വർഗ്ഗത്തിൽപ്പെട്ട ഒരു ചെടിയും അതിലെ പൂവും മാത്രമേ ഉണ്ടായിരുന്നുള്ളു. ഗുരു പറഞ്ഞു:
“ഒരുപാടെണ്ണം ഒന്നിച്ചു നിൽക്കുമ്പോൾ, ഏറ്റവും ഭംഗിയുള്ള പുഷ്പം അങ്ങു ശ്രദ്ധിക്കാതെ പോകും. അതുകൊണ്ട് ബാക്കിയെല്ലാം ഞങ്ങൾ പറിച്ചു മാറ്റി!”

ഏറ്റവും ശ്രേഷ്ഠമായതിനു, ഏറ്റവും വിശിഷ്ഠമായ സ്ഥാനമുണ്ടാകും. ആൾക്കൂട്ടത്തിനിടയിലെ അസാധരണത്വം പലപ്പോഴും ശ്രദ്ധിക്കപ്പെടാതെപോയി എന്നു വരാം. എങ്ങനെ നിൽക്കുന്നു എന്നതുപോലെ, എവിടെ നിൽക്കുന്നുവെന്നതും പ്രസക്തമാണ്. ശ്രദ്ധിക്കപ്പെടുന്ന സ്ഥലങ്ങളിൽ നിൽക്കുന്നവർക്ക് നിലനില്പിനേക്കുറിച്ചു ശ്രദ്ധിക്കേണ്ടി വരില്ല! മറ്റുള്ളവരുടെ കളിത്തട്ടിൽ ആളൊഴിയുന്നതും കാത്തിരുന്നാൽ ഒരു പക്ഷെ, ആജീവനാന്തം നാം കാത്തിരിക്കേണ്ടി വരും.

എത്രനല്ല വിളയായാലും, വേർതിരിക്കപ്പെടും: നെല്ലും പതിരും മാത്രമല്ല; നല്ലതും മികച്ചതും തമ്മിലും! തൃപ്തികരമായതും, ഗുണകരമായതും, ഉത്തമമായതുമെല്ലാം ഒന്നിച്ചു കൂട്ടിവെച്ചാൽ, ഒന്നിനും മൂല്യമുണ്ടാകണമെന്നില്ല. മാറ്റി നിർത്തപ്പെടാ
നാകാത്ത മികവാണ് കാര്യക്ഷമതയുടെ മാറ്റു നിർണയിക്കുന്നത്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര