🌹 “ഇന്നത്തെ ചിന്താവിഷയം” 🌹 – 2024 | സെപ്റ്റംബർ 11 | ബുധൻ ✍ പ്രൊഫസ്സർ എ.വി. ഇട്ടി മാവേലിക്കര

വഴിതെളിച്ചു് ഒഴുകാൻ ആകട്ടെ
————————————————–

കടലിൽ നിറയെ വെളളം. പക്ഷെ ഉപ്പുരസമാണ്; കുടിക്കാനാകില്ല. ഒരിക്കൽ നദികളെല്ലാം ഒത്തുചേർന്ന്, കടലിനോടു പരാതി പറഞ്ഞു: “ഞങ്ങൾ ഒഴുകി വരുമ്പോൾ, ശുദ്ധജലമാണ്. പക്ഷെ, നിൻ്റെ കൂടെ കൂടുമ്പോൾ ഉപ്പുവെള്ളമായി മാറുന്നു. തൻ്റെ മേൽ കുറ്റം ചാരാനാണു നദികളുടെ ശ്രമം എന്നു മനസ്സിലാക്കിയ കടൽ പറഞ്ഞു: “നിങ്ങൾക്ക് ഉപ്പുരസം വരാതിരിക്കാൻ ഒരു മാർഗമുണ്ട് . ഇനിമേൽ ഒഴുകാതിരിക്കുക”. അതു നടപ്പുള്ള കാര്യമല്ലാഞ്ഞതിനാൽ അവ ഒഴുകിക്കൊണ്ടേയിരുന്നു.

ഒഴുക്ക് ഒരു പ്രക്രീയയാണ്. അതിനൊരു ലക്ഷ്യവുമുണ്ടാകും. യാത്ര തുടങ്ങുന്ന ഓരോ തുള്ളി വെള്ളത്തിൻ്റെയും ആഭിമുഖ്യം കടലിനോടായിരിക്കും. എവിടെ എത്തിച്ചേരണമെന്നു തീരുമാനിച്ച് , യാത്ര ചെയ്യുന്ന ഒരാളും വഴിപിഴച്ചു പോകാറില്ല. വഴിയറിയാവുന്നതുകൊണ്ടു മാത്രമല്ല; എവിടെയാണ് എത്തിച്ചേരേണ്ടത് എന്ന് അറിയാവുന്നതുകൊണ്ടും കൂടെ. പദ്ധതികൾക്കനുസരിച്ചാണ്, പാതകൾ രൂപപ്പെടുന്നത്.

എങ്ങനെ ഒഴുകണമെന്നു പുഴയ്ക്കറിയാം. പുഴ ഒഴുകിക്കൊണ്ടിരിക്കും, മാർഗ്ഗതടസങ്ങളെ മറികടന്ന് ഒരു പുഴയും മാർഗ്ഗമദ്ധ്യേ യാത്ര അവസാനിപ്പിക്കാറില്ല. അവ വഴി ചോദിക്കാറുമില്ല. പുഴയാണു വഴി. വഴിയന്വേഷിച്ചു പോകുന്ന പലരും, പല വഴി തിരിഞ്ഞുവെന്നു വന്നേക്കാം. ചിലർ പെരുവഴിയിൽ അവസാനിച്ചെന്നുമിരിക്കും. വഴികണ്ടെത്തി യാത്ര ചെയ്യുന്നവർ, വിജയികളാകും. വഴിയുണ്ടാക്കി സഞ്ചരിക്കുന്നവർ ഇതിഹാസങ്ങളും. തനതു വഴികൾക്കു രൂപം കൊടുക്കുന്നവർ മാത്രമേ തനിമ കണ്ടെത്തൂ.

നിശ്ചലത നൈമഷീകം മാത്രമാകണം. നിലച്ചുപോകുന്നതൊന്നും, നിലനിൽക്കാറില്ല. യാത്രയിലുണ്ടായിരുന്ന ഊർജം ലക്ഷ്യത്തിലെത്തിച്ചേർന്നാലും നിലനിർത്താനുമാകണം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര