മനാമ: ബഹ്റൈനില് നിരവധി പേരില്‍ ജനിതകമാറ്റം വന്ന കൊവിഡ് റിപ്പോര്‍ട്ട് ചെയ്തതിന്റെ പശ്ചാതലത്തില്‍ കടുത്ത നിയന്ത്രണങ്ങള്‍ ഇന്ന് മുതല്‍ നിലവില്‍ വരും. ആദ്യപടിയായി രാജ്യത്തെ സ്‌കൂളുകള്‍, കഫേകള്‍, റസ്റ്റോറന്റുകള്‍, മറ്റു ഭക്ഷണ ശാലകള്‍ എന്നിവ മൂന്ന് ആഴ്ചത്തേയ്ക്ക് അടച്ചിടും. സ്‌കൂളുകളില്‍ ഓണ്‍ലൈന്‍ സംവിധാനം തുടരും.
2020 ഡിസംബര്‍ മുതല്‍ രാജ്യത്ത് കൊവിഡ് കേസുകള്‍ കൂടിവരികയാണെന്നാണ് റിപ്പോര്‍ട്ട്. അതിനിടയിലാണ് പുതിയ വൈറസ് കണ്ടെത്തിയെന്ന റിപ്പോര്‍ട്ടുകളും പുറത്തുവന്നിരിക്കുന്നത്. രാജ്യത്തെ പ്രവാസി ജീവനക്കാരിലും കൊവിഡ് കൂടുതല്‍ വ്യാപിക്കുന്നതായി കഴിഞ്ഞ ദിവസം വ്യക്തമായിരുന്നു.
അതേസമയം, ബഹ്റൈനില് വാക്സിന് വിതരണം സജീവമായി തുടരുകയാണ്. ലോകത്ത് ആളോഹരി വാക്സിന് വിതരണത്തിന്റെ കാര്യത്തില്‍ മൂന്നാമതാണ് ബഹ്‌റൈന്‍. ഫൈസറിന്റേയും സിനോഫാമിന്റേയും വാക്സിനുകളാണ് രാജ്യത്ത് വിതരണം ചെയ്യുന്നത്.
സ്വദേശികള്‍ക്കും പ്രവാസികള്‍ക്കും വാക്സിന് സൗജന്യമാണ്. 25ന് ആസ്ട്രാസെനക്കയുടെ വാക്സിന് ബഹ്‌റൈന്‍ ആരോഗ്യമന്ത്രാലയം അടിയന്തര അനുമതി നല്‍കിയിരുന്നു.
