📖📚’വായിക്കാം വളരാം’ 📚📖(4) സൗന്ദര്യം സ്വാതന്ത്ര്യമോ? (കഥ) ✍ദിയ ദിലീപ്

ഈയാഴ്ചയിലെ “വായിക്കാം വളരാം” എന്ന പംക്തിയിൽ, തിരുവല്ല പെരിങ്ങര പി.എം.വി എച്ച് എസ് ആറാം ക്ലാസ്സ് വിദ്യാർത്ഥിനിയായ ദിയ ദിലീപ് എഴുതിയ ഒരു കഥയാണ്.

സൗന്ദര്യം സ്വാതന്ത്ര്യമോ?

പണ്ടുപണ്ട് മയിൽ ഒരു സാധാരണ പക്ഷിയായിരുന്നു.ഒരു ഭംഗിയുമില്ല കാണാൻ. ഇന്ന് കാണുന്ന തൂവലുകളൊന്നുമില്ല. മറ്റു പക്ഷികളെ പോലെ തന്നെ ആകാശത്തു പറന്നു നടക്കുന്ന ഒരു സാധാരണ പക്ഷി.

മയിലിന് തന്റെ രൂപം തീരെ ഇഷ്ടമായിരുന്നില്ല. എന്തെങ്കിലും ഒരു പ്രത്യേകത വേണ്ടേ? സൗന്ദര്യം വേണ്ടേ?

ഒരു ദിവസം മയിൽ കാട്ടിലെ ദേവതയെ പോയിക്കണ്ടു.”എനിക്ക് ഈ കറുത്ത തൂവലുകൾ വേണ്ട. മറ്റു പക്ഷികൾ എന്നല്ല ആരു കണ്ടാലും അസൂയപ്പെടുന്ന മനോഹരങ്ങളായ തൂവലുകൾ നൽകി എന്നെ അനുഗ്രഹിക്കണം “.

ദേവത മയിലിനോട് പറഞ്ഞു “നിനക്ക് മനോഹരമായ തൂവലും ചിറകുകളും നൽകാം, പക്ഷേ നിനക്ക് പറക്കാൻ കഴിയില്ല ”

“പറക്കാൻ കഴിഞ്ഞില്ലേലും ഭംഗിയുള്ള തൂവലുകൾ തന്നാൽ മതി “മയിൽ പറഞ്ഞു.

ദേവത മയിലിനു ആഗ്രഹിച്ചതുപോലെ മനോഹരമായ തൂവലും ചിറകുകളും നൽകി. അതിന് വലിയ സന്തോഷമായി. അത് അഭിമാനത്തോടെ തന്റെ ചിറകുകൾ വിടർത്തി ചുവടു വെച്ചു. മഴവില്ലിന്റെ നിറങ്ങളെ വെല്ലുന്ന മയിൽ‌പീലി കണ്ട് മറ്റു പക്ഷികൾ അത്ഭുതപ്പെട്ടു. എല്ലാവരും മയിലിനെ പ്രശംസിച്ചു.

അവ പറഞ്ഞു :”ഹൊ!മയിലിനെക്കാണാൻ എന്തു ഭംഗി.ആ തൂവലുകളിലില്ലാത്ത നിറമില്ല. എന്തു ഭംഗിയുള്ള ചിറകുകൾ! എത്ര നീളമുള്ള വാല്. നമ്മളാരും മയിലിന്റെ ഏഴയലത്തെത്തില്ല”.

അപ്പോഴാണ് ഒരു പരുന്ത് വളരെ ഉയരത്തിൽ പറക്കുന്നത് മയിലിന്റെ കണ്ണിൽപെട്ടത്. മയിലിന് പെട്ടന്ന് ഒരു മോഹമുദിച്ചു. തനിക്കു മുമ്പത്തെ പോലെ ഒന്നു പറക്കണം. അത് ചിറകുകൾ വിടർത്തി പറന്നുയരാൻ നോക്കി.കഷ്ടിച്ച് ഒരടിയെ ഉയരാൻ കഴിഞ്ഞുള്ളു.

“ഇല്ല. എനിക്കിനി പറക്കാൻ കഴിയില്ല. ഭംഗിയുള്ള ഈ ചിറകുകൾക്ക് ഭാരവുമുണ്ട്. അത് പറക്കാൻ സഹായിക്കില്ല. ഇനി എനിക്ക് സ്വാതന്ത്ര്യത്തോടെ ആകാശത്തു പറന്നു നടക്കാൻ പറ്റില്ലലോ….”

ഗുണപാഠം : പുതിയ ചില ഗുണങ്ങൾ നേടിയെടുക്കുമ്പോൾ മുൻപുണ്ടായിരുന്ന ചില ഗുണങ്ങൾ നഷ്ടപ്പെട്ടേക്കാം.

ദിയ ദിലീപ്
6th std, Pmv HS
പെരിങ്ങര, തിരുവല്ല

***************************************************************

മലയാളി മനസ്സ് ഫീച്ചേഴ്സ് എഡിറ്റർ ശ്രീമതി ദിവ്യ എസ് മേനോൻ അവതരിപ്പിക്കുന്ന പുതിയ പംക്തിയാണ്