നപ്പാനി (ഇന്ത്യാന): ഇന്ത്യാനയിൽ നിന്നുള്ള യു.എസ് കോൺഗ്രസ് അംഗം (റിപ്പബ്ലിക്കൻ) ജാക്കി പലോർസ്കി (58) ഉൾപ്പടെ നാലു പേർ ബുധനാഴ്ച (ഓഗസ്റ്റ് 3) പുലർച്ചെയുണ്ടായ വാഹനാപകടത്തിൽ കൊല്ലപ്പെട്ടതായി എൽക്കാർട്ട് കൗണ്ടി ഷെരീഫ് ഓഫീസ് അറിയിച്ചു.
എസ്.യു.വിയിൽ സഞ്ചരിച്ചിരുന്ന ജാക്കിയും, ഇവരുടെ കമ്യൂണിക്കേഷൻ ഡയറക്ടർ എമ തോംസൺ (28), ഡിസ്ട്രിക്ട് ഡയറക്ടർ സാഖറി പോട്ട്സ് (27) എന്നിവരും കൂട്ടിയിടിച്ച വാഹനത്തിലെ ഡ്രൈവർ എഡിക്ക് (56) എന്നീ നാലുപേരാണ് അപകടത്തിൽ കൊല്ലപ്പെട്ടത്.
നപ്പാനി എസ്.ആർ 19 സൗത്ത് ബൗണ്ടിലൂടെ സഞ്ചരിച്ചിരുന്ന ജാക്കിയുടെ എസ്.യു.വിയിൽ നോർത്ത് ബൗണ്ടിൽ സഞ്ചരിച്ചിരുന്ന മറ്റൊരു എസ്.യു.വിയുമായി നേരിട്ട് ഇടിക്കുകയായിരുന്നു.
2013-ലാണ് ജാക്കി ആദ്യമായി ഇന്ത്യാന സെക്കൻഡ് കൺഗ്രഷണൽ ഡിസ്ട്രിക്ടിൽ നിന്നും യു.എസ് കോൺഗ്രസിലേക്ക് തെരഞ്ഞെടുക്കപ്പെട്ടത്. മരിക്കുന്നതുവരെയും ആ സ്ഥാനത്ത് തുടർന്നു. 2005 മുതൽ 2010 വരെ ഇന്ത്യാ ഹൗസ് പ്രതിനിധിയുമായിരുന്നു.
1963 ഓഗസ്റ്റ് 7-ന് ഇന്ത്യാനയിൽ ജനിച്ച് ഇവർ റെയ്‍ലി ഹൈസ്കൂളിൽ നിന്നും ഗ്രാജുവേറ്റ് ചെയ്തു. ലിബർട്ടി യൂണിവേഴ്സിറ്റി, ടെയ്‌ലർ യൂണിവേഴ്സിറ്റി എന്നിവടങ്ങളിൽ കോളജ് വിദ്യാഭ്യാസം പൂർത്തിയാക്കി.
ഇവരുടെ ആകസ്മിക വിയോഗത്തിൽ ഹൗസ് മജോറിട്ടി ലീഡർ കെവിൻ മക്കാർത്ത, യു.എസ് ഹൗസ് സ്പീക്കർ നാൻസി പെലോസി എന്നിവർ അഗാധ ദുഖം രേഖപ്പെടുത്തി. പ്രസിഡന്റ് ബൈഡനും, ജിൽ ബൈഡനും ഇവരുടെ കുടുംബാംഗങ്ങളെ അനുശോചനം അറിയിച്ചു. മരിച്ചവരോടുള്ള ബഹുമാനാർത്ഥം വൈറ്റ് ഹൗസിലെ ദേശീയ പതാക ബുധനാഴ്ചയും വ്യാഴാഴ്ചയും പാതി താഴ്ത്തിക്കെട്ടുമെന്നും അറിയിച്ചു
റിപ്പോർട്ട്: പി.പി. ചെറിയാൻ
