🌸”ഇന്നത്തെ ചിന്താവിഷയം”🌸 ✍പ്രൊഫസ്സർ എ.വി. ഇട്ടി മാവേലിക്കര

വിശ്വാസമൊരു പുകമറയാക്കരുത്
……………………………………………………………….

ഗുരുവും ശിഷ്യനും കൂടി ഒട്ടകപ്പുറത്തു കയറി യാത്രയായി. ശിഷ്യനായിരുന്നു ഒട്ടകത്തെ പരിപാലിക്കേണ്ട ഉത്തരവാദിത്തം. രാത്രി അവരൊരു സത്രത്തിലെത്തി. ഒട്ടകത്തെ കെട്ടിയിടണമെന്നു പറഞ്ഞിട്ടു ഗുരു വിശ്രമത്തിനായി അകത്തേക്കു പോയി. ശിഷ്യനും, ഒട്ടകത്തെ കെട്ടിയിടാനൊന്നും മെനക്കെടാതെ, “ദൈവമെ , ഒട്ടകത്തെ കാത്തുകൊള്ളണമെ”യെന്നു പ്രാർത്ഥിച്ചിട്ട് ഉറങ്ങാൻ പോയി. നേരം വെളുത്തപ്പോൾ ഒട്ടകത്തെ കാണാനില്ല. ഗുരു ചോദിച്ചു: “ഒട്ടകം എവിടെ” ശിഷ്യൻ പറഞ്ഞു: “അറിയില്ല”. “നീ ഒട്ടകത്തെ കെട്ടിയിട്ടില്ലെ ?”,ഗുരു ചോദിച്ചു. അങ്ങു പറയാറില്ലെ, “എല്ലാം ഈശ്വരനെ ഭരമേൽപ്പിച്ചാൽ മതിയെന്ന്”ശിഷ്യൻ തിരിച്ചു ചോദിച്ചു. ഗുരു പറഞ്ഞു: “ഈശ്വരനിൽ വിശ്വസിച്ചു കൊള്ളക പക്ഷേ ഒട്ടകത്തെ കെട്ടാൻ ഈശ്വരനു നിൻ്റെ കൈകൾ മാത്രമേയുള്ളൂ!”

വിവേകം, വിശ്വാസത്തിനു മുന്നിൽ അടിയറ വയ്ക്കരുത്. വിചാരശൂന്യതയല്ല വിശ്വാസം. സ്വന്തം കഴിവുകളുടെയും കാര്യനിർവ്വഹണ ശേഷിയുടെയും അപ്പുറത്താകണം, വിശ്വാസത്തിൻ്റെ അതിർവരമ്പുകൾ നിർമ്മിക്കേണ്ടത്. സൃഷ്ടിക്കു സ്വയം ചെയ്തു തീർക്കാൻ ശേഷിയുള്ളയൊരു കാര്യത്തിലും സൃഷ്ടാവ് ഇടപെടില്ല. എന്നാൽ സ്വന്തം കൈകൾ കൊണ്ടെത്തിപ്പിടിക്കാനാകാത്ത എല്ലാ ലക്ഷ്യങ്ങളിലും, ദൈവത്തിൻ്റെ അദൃശ്യ കരങ്ങൾ വ്യാപരിച്ചു കൊണ്ടിരിക്കും ചെയ്യും

ഈശ്വരവിശ്വാസം ഒരു പുകമറയാക്കരുത്. സ്വന്തം അലസതയെ സാധുകരിക്കാൻ ഒരിക്കലും വിശ്വാസത്തെ കൂട്ടുപിടിയ്ക്കരുത്. എല്ലാ കാര്യങ്ങളും ഈശ്വരനെ ഭരമേൽപിച്ച്, ആലസ്യത്തിൻ്റെ പട്ടുമെത്തയിൽ കിടന്നുറങ്ങുന്നവരോടൊപ്പമല്ല ഈശ്വരനുണ്ടാകുക, മറിച്ച് ഭാരം വഹിക്കുന്നവരുടെ കൂടെയാണീശ്വരൻ. “താൻ പാതി, ദൈവം പാതി”യെന്നാണു ജ്ഞാനമൊഴി! വിശ്വാസം ഒഴികഴിവിനുള്ള ഉപാധിയല്ല. വിയർപ്പൊഴുക്കുന്നവനു മാത്രമേ, വിശ്വാസം കൂട്ടാകൂ

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു. നന്ദി, നമസ്ക്കാരം🙏

പ്രൊഫസ്സർ എ.വി. ഇട്ടി ✍മാവേലിക്കര