🌸”ഇന്നത്തെ ചിന്താവിഷയം”🌸 ✍പ്രൊഫസ്സർ എ.വി. ഇട്ടി മാവേലിക്കര

മുൻവിധിയില്ലാതെ പെരുമാറാനാകട്ടെ.
…………………………………………………………………………

ഒന്നാം ക്ലാസ്സുകാരിയായ ഒരു കുട്ടിക്ക് രണ്ടു മിഠായികൾ കിട്ടി. അവൾ വേഗമതുമായി അമ്മയുടെ അരികിലെത്തി. അമ്മയവളോടു ഒരെണ്ണം ചോദിച്ചു, കുറേനേരം അമ്മയെ നോക്കിയിട്ടവൾ, രണ്ടു മിഠായിയിലുമോരോ തവണ കടിച്ചു. അമ്മയ്ക്കു ലേശം സങ്കടം തോന്നാതിരുന്നില്ല. അതിനു ശേഷം മിഠായികളിലൊന്ന് അമ്മയ്ക്കുനേരേ നീട്ടിക്കൊണ്ടവൾ പറഞ്ഞു: “അമ്മെ ഇതെടുത്തോളൂ ഇതിനാണു മധുരം കൂടുതൽ ”

സ്വന്തം വ്യാഖ്യാനങ്ങൾ നാം മറ്റുള്ളവരുടെ മേൽ അടിച്ചേൽപ്പിക്കരുത്. അറിവും അനുഭവവും നമ്മെ തുറന്ന മനസ്സോടെ പെരുമാറുന്നതിനു സഹായിക്കണം. എന്നാൽ, പലപ്പോഴുമതല്ല സംഭവിക്കുന്നത്. പലപ്പോഴും യാഥാർത്ഥ്യമറിയാനുള്ള ശ്രമം പോലും നടക്കുന്നില്ല. അങ്ങനയെങ്കിൽ ദുർവ്യാഖ്യാനങ്ങൾക്കോ ദുഷ്പ്രചരണങ്ങൾക്കോ ഇടമുണ്ടാകുമായിരുന്നില്ല.

ഒന്നു കാത്തിരുന്നു കൂടെ,ഒന്നുകിലെല്ലാം സ്വയം തെളിയും. അല്ലെങ്കിൽ കരണക്കാരായവർ തന്നെ കാലക്രമേണ ഉത്തരങ്ങൾനൽകും. മറ്റുള്ളവരുടെ വാക്കുകൾക്കും പ്രവൃത്തികൾക്കും അവർ പോലും ഉദ്ദേശിക്കാത്ത വ്യാഖ്യാനങ്ങൾ നൽകി, നാം സ്വയം സംഘർഷത്തിലാകുന്നതെന്തിനാണ്. വരികൾക്കിടയിലും, കർമ്മങ്ങൾക്കിടയിലും, നാം കല്പിക്കുന്ന അർത്ഥങ്ങളും, വ്യാഖ്യാനങ്ങളും നൽകി ബന്ധങ്ങൾ വഷളാക്കുന്നതെന്തിനാണ്.

എന്തു കൊണ്ടിങ്ങനെയെന്നത് സ്പഷ്ടതയ്ക്ക് വേണ്ടിയുള്ള ചോദ്യമാകണം. സ്വന്തം അനുമാനത്തിനു വേണ്ടിയുള്ള ഊഹാപോഹങ്ങളാകരുത്. സ്വയം വിശദീകരിക്കാനെല്ലാവർക്കും അവസരവും,അവകാശവും നൽകിയാൽത്തന്നെ, പല തെറ്റിദ്ധാരണകളും ഇല്ലാതാകും. സ്വയം വിശദീകരിക്കുകയും അതിനു മറ്റുള്ളവരെ അനുവദിക്കുകയും വേണം. അപ്പോൾ തെറ്റിദ്ധാരണകളെല്ലാം പമ്പ കടക്കും. മുൻ വിധിയില്ലാതെ നമുക്കു പെരുമാറാനാകട്ടെ

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു. നന്ദി, നമസ്ക്കാരം🙏

പ്രൊഫസ്സർ എ.വി. ഇട്ടി മാവേലിക്കര✍