🌸”ഇന്നത്തെ ചിന്താവിഷയം”🌸 ✍പ്രൊഫസ്സർ എ.വി. ഇട്ടി മാവേലിക്കര

ഭയരഹിത വിമർശനം
…………………………………………

അലക്സാണ്ടർ ചക്രവർത്തി ഒരു പടയോട്ടം കഴിഞ്ഞു ഗ്രീസിൽ മടങ്ങിയെത്തി. ജനങ്ങളെല്ലാം അദ്ദേഹത്തിൻ്റെ ചുറ്റും കൂടി. ചക്രവർത്തിയുടെ കഴിവുകളെയും, യുദ്ധ തന്ത്രങ്ങളെയുമെല്ലാം പ്രകീർത്തിക്കാനായിരുന്നു ഏവർക്കും താൽപര്യം. എന്നാൽ ചിന്തകനായിരുന്ന ഡയോജനീസിനു മാത്രം, ചക്രവർത്തിയുടെ അധികാര മോഹത്തോടും, വെട്ടിപ്പിടുത്തങ്ങളോടും, യോജിപ്പുണ്ടായിരുന്നില്ല. അദ്ദേഹമതു പരസ്യമായി പറയുകയും ചെയ്തു.

ഡയോജനീസിനെ കാണാൻ ചക്രവർത്തി തീരുമാനിച്ചു. എല്ലാ രാജകീയ പ്രൗഢികളോടും സന്നാഹങ്ങളോടും കൂടി അദ്ദേഹം ഡയോജനീസിൻ്റെ മുന്നിലെത്തി. ചക്രവർത്തി അദ്ദേഹത്തോടു ചോദിച്ചു: “താങ്കൾക്കു ഞാനെന്താണു ചെയ്തു തരേണ്ടത്” ഒരു കൂസലുമില്ലാതെ ഡയോജനീസ് ഉത്തരം പറഞ്ഞു: “താങ്കളുടെ നിഴൽ കാരണമെനിക്കു സൂര്യപ്രകാശം നഷ്ടപ്പെടുന്നു. മുന്നിൽ നിന്നു കുറച്ചു മാറി നിൽക്കണം” പിൽക്കാലത്തു അലക്സാണ്ടർ ചക്രവർത്തി, തൻ്റെ ഡയറിയിലെഴുതി “അലക്സാണ്ടർ അല്ലായിരുന്നുവെങ്കിൽ, ഡയോജനീസ് ആകാനായിരുന്നു എനിക്കിഷ്ടം”.

മുഖസ്തുതി കൊണ്ടു മൂടുപടം നിർമ്മിക്കാനാണ് എല്ലാവർക്കും ഇഷ്ടം. അടുത്തുകൂടി അഭിനന്ദിക്കുന്നവർക്കു ചിലപ്പോൾ, അകലെ നിന്ന് അധിക്ഷേപിക്കുന്ന ശീലവും കാണും. എത്ര വലിയ ആത്മവിമർശകനും, പ്രശംസയെന്ന പ്രലോഭനത്തെ, അതിജീവിക്കാനുള്ള ശേഷി കുറവയിരിക്കും.ആ ബലഹീനതയിലാണ് പലരും തങ്ങളുടെ അന്നം കണ്ടെത്തുന്നതു തന്നെ. സ്വന്തവും സ്വതന്ത്രവുമായ അഭിപ്രായമില്ലാത്തവരാണു തരംതാണ തലവന്മാരെയും ഭരണാധികാരികളേയും സൃഷ്ടിക്കുന്നതിനു ഉത്തരവാദികൾ.

സ്വയരക്ഷ അപകടപ്പെടുത്തി വിമർശിക്കുന്നവർക്കു ചെവി കൊടുക്കണം. പിന്തിഞ്ഞു നോക്കാൻ സഹായിക്കുന്ന പ്രേരകശക്തി അവർക്കുണ്ടാകും. നേടാൻ ഒന്നുമില്ലാത്തവർക്കു നഷ്ടപ്പെടാനുമൊന്നുമുണ്ടാകില്ല. ഭയരഹിത വിമർശനങ്ങളുടെ നേർരേഖയിലൂടെയായിരിക്കും അവർ സഞ്ചരിച്ചുകൊണ്ടിരിക്കുക. വിമർശന ബുദ്ധിയുള്ള ആളുകളുടെ ഉറച്ച നിലപാടുകളും, വീക്ഷണങ്ങളുമാണ് സമൂഹത്തിൻ്റെ നിലനില്പിനും വളർച്ചക്കും മുഖാന്തിരമാകുന്നത്.

സർവ്വ ശക്തൻ തുണയ്ക്കട്ടെ..
ഏവർക്കും നന്മകൾ നേരുന്നു. നന്ദി, നമസ്ക്കാരം🙏

പ്രൊഫസ്സർ എ.വി. ഇട്ടി മാവേലിക്കര✍