റിപ്പോർട്ട്: പി.പി. ചെറിയാൻ
വാഷിംഗ്ടണ്‍ ഡി.സി: വെള്ളിയാഴ്ച യു.എസ്. സെനറ്റ് പാസ്സാക്കിയ 1.9 ട്രില്യണ്‍ കോവിഡ് 19 റിലീഫ് പാക്കേജിന്റെ ഭാഗമായി 60,000 ഡോളര്‍ വ്യക്തിഗത വാര്‍ഷീക വരുമാനമുള്ളവര്‍ക്ക് 1400 ഡോളര്‍ പൂര്‍ണ്ണമായും ലഭിക്കുമെന്ന് ട്രഷററി സെക്രട്ടറി ജാനറ്റ് യെല്ലന്‍ ഫെബ്രുവരി 7 ഞായറാഴ്ച പറഞ്ഞു.കണ്‍സര്‍വേറ്റീവ് ഡമോക്രാറ്റിക് സെനറ്റേഴ്‌സാണ് ഇങ്ങനെ ഒരു തീരുമാനത്തില്‍ എത്തിചേര്‍ന്നത്.
ഒരു എലിമെന്ററി സ്‌ക്കൂള്‍ അദ്ധ്യാപകനോ, ഒരു പോലീസുകാരനോ ഏകദേശം 60,000 ഡോളര്‍ വാര്‍ഷീക വരുമാനം ലഭിക്കുമ്പോള്‍ അവരുടെ കുട്ടികളുടെ വിദ്യാഭ്യാസത്തിന് ആവശ്യമായ പണം കണ്ടെത്തുക വിഷമകരമാണെന്നും, അങ്ങനെയുള്ളവരെ സഹായിക്കുക എന്നതാണ്. ബൈഡന്‍ അഡ്മിനിസ്‌ട്രേഷന്റെ നയമെന്നും സെക്രട്ടറി വ്യക്തമാക്കി. ട്രമ്പ് ഭരണത്തില്‍ സ്റ്റിമുലസ് ചെക്ക് ലഭിക്കുന്നതിന് നിശ്ചയിച്ചിരുന്ന വ്യക്തിഗത വാര്‍ഷീക വരുമാനം 75,000 ഡോളര്‍ ആയിരുന്നു. എന്നാല്‍ അത് 50,000 ആക്കി കുറക്കണമെന്ന തീരുമാനം ശരിയല്ലാ എന്നതിനാലാണ് 60,000 ആയി നിശ്ചയിച്ചിരിക്കുന്നത്.
ഡമോക്രാറ്റിക് പാര്‍ട്ടിക്ക് ഇതുവരെ വ്യക്തമായ ഒരു തീരുമാനം സ്റ്റിമുലസ് ചെക്കിന്റെ കാര്യത്തില്‍ കണ്ടെത്താനായിട്ടില്ലെങ്കിലും, രണ്ടാഴ്ചയ്ക്കകം സ്റ്റിമുലസ് ചെക്കുകള്‍ ലഭിച്ചു തുടങ്ങുമെന്ന് സ്പീക്കര്‍ നാന്‍സി പെലോസി ഉറപ്പു നല്‍കി. ട്രമ്പ് നിശ്ചയിച്ച വാര്‍ഷീക വരുമാനത്തിനനുസൃതമായി ഒരു തീരുമാനം ഉണ്ടാകുകയില്ലെന്നാണ് ഇതുവരെയുളള റിപ്പോര്‍ട്ടുകള്‍ സൂചിപ്പിക്കുന്നത്.
