ഡാളസ്: മാർത്തോമ്മാ സഭയുടെ നോർത്ത് അമേരിക്ക – യൂറോപ്പ് ഭദ്രാസനാധിപൻ ബിഷപ് ഡോ.ഐസക് മാർ ഫിലക്സിനോസിന്റെ 71 – മത് ജന്മദിനമായ ഡിസംബർ 5 ഞായറാഴ്ച വൈകിട്ട് 6.30 ന് സൗത്ത് വെസ്റ്റ് റീജിയണൽ ആക്ടിവിറ്റി കമ്മറ്റിയുടെയും, ഡാളസ് ക്രോസ്സ് വേ മാർത്തോമ്മാ ഇടവകയുടെയും സംയുക്താഭിമുഖ്യത്തിൽ ഡാളസ് ഫാർമേഴ്‌സ് ബ്രാഞ്ച് മാർത്തോമ്മാ ഇവന്റ് സെന്ററിൽ വെച്ച് ജന്മദിനം പ്രൗഢഗംഭീരമായി ആഘോഷിച്ചു.
വെരി.റവ.ഡോ.ചെറിയാൻ തോമസ്, റവ.തോമസ് മാത്യു പി, റവ. എബ്രഹാം കുരുവിള, റവ.ലാറി വർഗീസ് എന്നി വൈദികരെ കൂടാതെ സഭയുടെ വിവിധ സംഘടനകളുടെ ഭദ്രാസന സെക്രട്ടറിമാരായ ഈശോ മാളിയേക്കൽ, സാം അലക്സ്, ബിജി ജോബി എന്നിവരും റീജിയണൽ ആക്ടിവിറ്റി കമ്മറ്റി സെക്രട്ടറി എബി ജോർജ്, ഭദ്രാസന അസംബ്ലി അംഗങ്ങൾ ആയ ജോജി കോശി, ഷേർളി എബ്രഹാം, ജിബിൻ മാത്യു എന്നിവർ ആശംസകൾ നേർന്ന് സംസാരിച്ചു.
അശരണരുടെയും, ആലംബഹീനരുടെയും, രോഗികളുടെയും ഉന്നമനത്തിന് പ്രാധാന്യം നൽകി പ്രവർത്തിച്ചു കൊണ്ടിരിക്കുന്ന ബിഷപ് ഡോ.മാർ ഫിലക്സിനോസിന്റെ സപ്തതിയുടെ ഭാഗമായി റീജിയണൽ ആക്ടിവിറ്റി കമ്മറ്റിയുടെ നേതൃത്വത്തിൽ നേറ്റിവ് അമേരിക്കൻ വിഭാഗത്തിൽപ്പെട്ട ചോക്റ്റോ ആദിവാസികളുടെ മക്കൾക്ക് പഠനത്തിനായി ബിഷപ് ഡോ.മാർ ഫിലക്സിനോസ് സപ്തതി സ്‌കോളർഷിപ്പ് എന്ന പദ്ധതിക്ക് തുടക്കം കുറിച്ചു. കൂടാതെ ക്രോസ്സ് വേ മാർത്തോമ്മാ ഇടവകയുടെ നേതൃത്വത്തിൽ അഫ്ഘാനിസ്ഥാൻ അഭയാത്രികളെ സഹായിക്കുവാനായി അഫ്‌ഘാൻ കെയർ പ്രോഗ്രാമിനും തുടക്കം കുറിച്ചു.
സൗത്ത് വെസ്റ്റ് റീജിയണിലെ സെന്റർ എ യിൽപ്പെട്ട മാർത്തോമ്മാ ഇടവകളിലെ ക്ഷണിക്കപ്പെട്ട അതിഥികളുടെ നിറസാന്നിധ്യത്തിൽ നടത്തപ്പെട്ട സമ്മേളനത്തിൽ പ്രത്യേകം തയ്യാറാക്കപ്പെട്ട ജന്മദിന കേക്ക് മുറിച്ച് ബിഷപ് ഡോ.മാർ ഫിലക്സിനോസ് മധുരം പങ്കുവെച്ചു. ഡിന്നറോടുകൂടി നടത്തപ്പെട്ട സമ്മേളനത്തിൽ ഡാളസിലെ പ്രശസ്ത ഗായകരായ അലക്സ് പാപ്പച്ചൻ, സൂജ ഡേവിഡ്, സെൽവിൻ സ്റ്റാൻലി എന്നിവരുടെ ശ്രുതി മധുരമായ ഗാനങ്ങൾ നിറപകിട്ടേകി.
ഡാളസിലെ മിക്ക മാർത്തോമ്മാ ഇടവകകളും സന്ദർശിച്ച് വിശുദ്ധ കുർബ്ബാന ശുശ്രുഷയും, ആദ്യമായി കുർബ്ബാന കൈക്കൊള്ളുന്ന കുഞ്ഞുങ്ങളുടെ ശുശ്രുഷയും നടത്തിയ ഭദ്രാസനാധിപൻ ബിഷപ് ഡോ.മാർ ഫിലക്സിനോസ് ഏവർക്കും ക്രിസ്തുമസ്സ് പുതുവത്സരാശംസകൾ നേർന്നു.
(ഷാജീ രാമപുരം)
