ലണ്ടൻ: എലിസബത്ത് രാജ്ഞിയുടെ ഭർത്താവ് ഫിലിപ്പ് രാജകുമാരൻ (99) അന്തരിച്ചു. വെള്ളിയാഴ്ച രാവിലെ വിൻഡ്സർ കാസ്റ്റിലായിരുന്നു അന്ത്യം. ബെക്കിംഗ്ഹാംകൊട്ടാരമാണ് ഇക്കാര്യം അറിയിച്ചത്.
1921 ജൂൺ 10ന് ഗ്രീക്ക്–ഡാനിഷ് രാജകുടുംബത്തിലാണ് ഫിലിപ്പ് രാജകുമാരൻ ജനിച്ചത്. രാജകീയ നാവിക സേനാ ഉദ്യോഗസ്ഥനായിരുന്ന ഫിലിപ്പും എലിസബത്തും തമ്മിലുള്ള വിവാഹം 1947ലായിരുന്നു. പിന്നീട് ദമ്പതികൾ മാൾട്ടായിലേക്കു പോയി. അവിടെയായിരുന്നു ഫിലിപ്പിനു പോസ്റ്റിംഗ് കിട്ടിയത്. 1952 ൽ പിതാവ് ജോർജ് ആറാമൻ ദിവംഗതനായതിനെത്തുടർന്ന് ബ്രിട്ടീഷ് സിംഹാസനത്തിന്‍റെ അവകാശം എലിസബത്ത് രാജ്ഞിക്കായി.
രാജ്ഞിയുടെ ഭർത്താവായതിനാൽ നേവിയിൽ കിട്ടേണ്ട ഉന്നത പദവികൾ നഷ്ടമായെന്നു ഫിലിപ്പു രാജകുമാരൻ പരിതപിക്കുകയുണ്ടായി. 2017 ലാണ് അദ്ദേഹം ഔദ്യോഗിക ചുമതലകളിൽ വിരമിച്ചത്.
എലിസബത്ത് രാജ്ഞിയുടെ പ്രധാനപ്പെട്ട വിദേശസന്ദർശനങ്ങളിലെല്ലാം ഫിലിപ്പ് രാജകുമാരനും ഒപ്പംചേരാറുണ്ട്. രാജദമ്പതികൾ മൂന്നുതവണ ഇന്ത്യയിലെത്തിയിരുന്നു. 1961 ലായിരുന്നു ആദ്യത്തെ ഇന്ത്യാ സന്ദർശനം. 1983 ലും 1997 ലും വീണ്ടുമെത്തിയിരുന്നു.
