(വാർത്ത: പി.പി. ചെറിയാൻ)
ഡാളസ് : ടെക്‌സസ് സംസ്ഥാനത്തെ ആദ്യ കോവിഡ് വാക്‌സീന്‍ മെത്തഡിസ്റ്റ് ഡാളസ് മെഡിക്കല്‍ സെന്ററിലെ എമര്‍ജന്‍സി റൂം ക്ലീന്‍ ചെയ്യുന്ന 51 വയസ്സുള്ള തെരേസ്സ മാറ്റക്ക് നല്‍കിയതായി മെത്തഡിസ്റ്റ് ഹെല്‍ത്ത് സിസ്റ്റം സിഇഒ ജിം സ്‌ക്കോജിന്‍ അറിയിച്ചു. നാലു മക്കളുടെ മാതാവാണ് തെരേസ്സ. തിങ്കളാഴ്ചയാണ് കോവിഡ് വാക്‌സീന്‍ യുപിഎസ് ട്രക്ക് വഴി രാവിലെ 8.50ന് ആശുപത്രിയില്‍ എത്തിച്ചേര്‍ന്നത്.
പത്തുമണിയോടെ വാക്‌സീന്‍ സ്വീകരിച്ച തെരേസ്സയെ സഹപ്രവര്‍ത്തകര്‍ മുന്‍വശത്തെ ഓഡിറ്റോറിയത്തില്‍ ഒത്തുചേര്‍ന്ന് അഭിനന്ദിച്ചു. 5850 വാക്‌സീനാണ് ഇവിടെ എത്തിചേര്‍ന്നത്. നൂറോളം ജീവനക്കാര്‍ ആദ്യ ദിവസം തന്നെ വാക്‌സീന്‍ സ്വീകരിച്ചു. അടുത്ത ദിവസം ഇരുനൂറിനും മുന്നൂറിനും ഇടയില്‍ ജീവനക്കാര്‍ക്ക് വാക്‌സീന്‍ നല്‍കും.
ആദ്യ ആഴ്ച ടെക്‌സസിലേക്ക് 224 250 ഡോസാണ് അനുവദിച്ചിരിക്കുന്നത്. ചൊവ്വാഴ്ച ഡാലസിലെ പാര്‍ലാന്റ് ആശുപത്രി, യുറ്റി സൗത്ത് വെസ്റ്റേണ്‍ മെഡിക്കല്‍ സെന്റര്‍ ഡാളസ് എന്നീ ആശുപത്രികള്‍ ഉള്‍പ്പെടെ 19 സൈറ്റുകളിലേക്ക് 75075 ഡോസ് വാക്‌സീന്‍ അനുവദിച്ചിട്ടുണ്ട്.
“കോവിഡ് 19 രോഗത്തില്‍ നിന്നും എനിക്ക് എല്ലാവരേയും സംരക്ഷിക്കേണ്ടതുണ്ട്. പ്രത്യേകിച്ച് എന്റെ കുടുംബാംഗങ്ങളേയും, എന്നേയും തന്നെ’ആദ്യ വാക്‌സീന്‍ സ്വീകരിച്ചതിനെ കുറിച്ചുള്ള ചോദ്യങ്ങള്‍ക്ക് പ്രതികരിക്കുകയായിരുന്നു തെരേസ്സാ.
