എല്ലാവർക്കും നമസ്കാരം
നമ്മുടെ നാട്ടിൽ നടക്കാൻ പാടില്ലാത്തതെല്ലാം നടക്കുന്നു. മറ്റു രാജ്യങ്ങളിലേതുപോലെ കടുത്ത ശിക്ഷാനടപടികളും പഴുതുകളില്ലാത്ത നിയമനടപടികളും വന്നാൽ തീരുന്ന പ്രശ്നങ്ങളേ ഉള്ളൂ. മലയാളി ഏതു രാജ്യത്തു പോയാലും അവിടത്തെ നിയമത്തിനനുസരിച്ചല്ലേ ജീവിക്കുന്നത്.
കുഴിപ്പണിയാരം, വത്തപ്പം എന്നു നമ്മുടെ നാട്ടിലും പഡ്ഡു എന്ന് കർണ്ണാടകയിലും അറിയപ്പെടുന്ന ഒരു ക്യൂട്ട് പലഹാരമാണ് ഇന്നത്തെ താരം. ഞാനും അനുജത്തിയും ഇവനെ ഉപ്പപ്പം എന്നാണ് പറയാറുള്ളത്. ഉണ്ണിയപ്പം പോലുള്ള ഉപ്പുരുചിയുള്ളവൻ ഉപ്പപ്പം.
ഉപ്പപ്പം
ആവശ്യമായ സാധനങ്ങൾ
ഇഡ്ഡലിമാവ്-ഒരു ബൗൾ
സവാള-മൂന്നെണ്ണം
പച്ചമുളക്-നാലഞ്ചെണ്ണം
തക്കാളി-രണ്ടെണ്ണം
കറിവേപ്പില-രണ്ടു തണ്ട്
മല്ലിയില-ആവശ്യത്തിന്
കാരറ്റ്-ഒരെണ്ണം
വെളിച്ചെണ്ണ-രണ്ടു ടീസ്പൂൺ
റിഫൈൻഡ്
ഉപ്പ്-അര ടീസ്പൂൺ
ഓയിൽ-നാലഞ്ചു ടീസ്പൂൺ
ഉണ്ടാക്കുന്ന വിധം
ഉള്ളി, പച്ചമുളക്, തക്കാളി, ഇവ ചെറുതായി മുറിച്ച് മൈക്രോവേവ് സേഫ് പാത്രത്തിലാക്കി അര ടീസ്പൂൺ ഉപ്പും വെളിച്ചെണ്ണയും ചേർത്ത് നന്നായി ഇളക്കി യോജിപ്പിച്ച് അഞ്ചു മിനിറ്റ് അവ്നിൽ വച്ച് വഴറ്റുക.
കാരറ്റ് തൊലികളഞ്ഞ് ഗ്രേറ്റ് ചെയ്തു വയ്ക്കുക.
മല്ലിയില, കറിവേപ്പില ചെറുതായി മുറിച്ചു വയ്ക്കുക
വഴറ്റിയ ഉള്ളിക്കൂട്ടിലേക്ക് കാരറ്റ്, മല്ലിയില, കറിവേപ്പില ചെറുതായി മുറിച്ചത് ചേർത്ത് നന്നായി ഇളക്കി യോജിപ്പിച്ച് മാവിലേക്ക് ചേർത്തിളക്കുക.
നോൺസ്റ്റിക് അപ്പക്കാര ചൂടാക്കി ഓരോ തുള്ളി വീതം എണ്ണയൊഴിച്ച് ചൂടാകുമ്പോൾ ഓരോ സ്പൂൺ മാവ് ഒഴിച്ച് പാകമാകുമ്പോൾ മറിച്ചിട്ട് വേവിക്കുക. മുഴുവൻ മാവും ഇതുപോലെ ചെയ്യുക.
ചൂടോടെ തേങ്ങാചട്നി കൂട്ടിക്കഴിക്കാം.
ബ്രേക്ക്ഫാസ്റ്റ് ആയും സ്നാക്സ് ആയും കഴിക്കാം.
തയ്യാറാക്കിയത്: ദീപാ നായർ (deepz) ബാംഗ്ലൂർ
