🌼മനോഹരം🌼 – ഒരു നാലുമണി പാലക്കാടൻ പലഹാരം

എല്ലാവർക്കും നമസ്കാരം

എല്ലാവർക്കും സുഖല്ലേ. ചായ കുടിച്ചു ഇനിയിപ്പോ എന്താ ചെയ്കാന്ന് ആലോചിച്ചിരിക്ക്യാവും. ല്ലേ. എന്നാപ്പിന്നെ നമ്മടെ മലയാളിമനസ്സ് ഒന്നു നോക്കാല്ലേ. എന്നെ മറന്ന്വോ നിങൾ്‌ രസമുകുളങ്ങളെ രസിപ്പിക്കാൻ പുതിയൊരു വിഭവവുമായി ഞാൻ എത്തീട്ടുണ്ട് ട്ടോ. വേഗം അതങ്ങട് വായിച്ചു നോക്കീട്ട് അഭിപ്രായം പറയൂന്നെ.

പാലക്കാട് പലഹാരങ്ങളുടെ നാടാണ്. മറ്റു ജില്ലകളിൽ കാണാത്ത പലഹാരങ്ങൾ പലതും പാലക്കാടിനു സ്വന്തമായുണ്ട്. രുചിയിലും വലിയ വ്യത്യാസം ഉണ്ട് പാലക്കാടൻ വിഭവങ്ങൾക്ക്. അതുപോലെ പാലക്കാട്ടുകാർക്കു മാത്രം അറിയാവുന്ന ഒരു നാലുമണി പലഹാരമാണ് ഇന്നത്തെ കഥാപാത്രം.

മനോഹരം പേരു പോലെ തന്നെ രുചിയുള്ള പലഹാരമാണ്. കടലമാവും അരിപ്പൊടിയും പഞ്ചസാരപ്പാവും ഒക്കെ ചേർത്ത് ഉണ്ടാക്കുന്ന ഒരു പലഹാരം. പേര് തന്നെ നല്ല രസകരം ല്ലേ.രുചികരമായ കറുമുറെ കഴിക്കാൻ പറ്റുന്ന ഒരു മധുര പലഹാരം. കൂടുതൽ വിവരിച്ച് ക്ഷമ പരിശോധിക്കുന്നില്ല.

🌼മനോഹരം 🌼

🌼ആവശ്യമുള്ള സാധനങ്ങൾ

🌼 കടലമാവ് – 1 കപ്പ്

🌼അരിപ്പൊടി – 1/4 കപ്പ്

🌼 വെള്ളം കുഴക്കാൻ ആവശ്യമായത്

🌼 എണ്ണ വറുക്കാൻ ആവശ്യമായത്

🌼നാളികേരം ചെറുതായി അരിഞ്ഞത് – 1/4 കപ്പ്

🌼 നെയ്യ് – 3 ടീസ്പൂൺ

🌼 ഏലയ്ക്ക പൊടിച്ചത് – 1/4 ടീ സ്പൂൺ

🌼 ചുക്ക് പൊടിച്ചത് – 1/4 ടീ സ്പൂൺ

🌼 ശർക്കരപ്പാവ് – 250 ഗ്രാം

🌼 വെള്ളം – 5 ടീസ്പൂൺ

🌼 പഞ്ചസാര – 5 ടീ സ്പൂൺ

🌼 ഉണ്ടാക്കുന്ന വിധം

🌼നാളികേരം നെയ്യിൽ വറുത്തു കോരുക.

🌼ഒരു പാത്രത്തിൽ കടലമാവും അരിപ്പൊടിയും ചേർത്ത് നന്നായി ഇളക്കുക. നാളികേരം വറുത്ത നെയ്യ് പൊടിയിൽ ചേർത്ത് നന്നായി യോജിപ്പിക്കുക. ആവശ്യത്തിന് വെള്ളം ചേർത്ത് കുഴച്ചു വയ്ക്കുക.(മാവ് ഒരുപാട് അയവിൽ ആവരുത്)

🌼 ശർക്കര 5 ടീ സ്പൂൺ വെള്ളം ചേർത്തുരുക്കി അരിച്ചു, വീണ്ടും സ്റ്റൗവിൽ വച്ചു പാവാക്കുക. (ഒരു നൂൽ പാകം)

🌼 എണ്ണ ചൂടാക്കി തയ്യാറാക്കിയ മാവു കൊണ്ട് ബൂന്ദി ഉണ്ടാക്കുക. (കണ്ണാപ്പ (ഓട്ടയുള്ള കയിൽ) എണ്ണയുടെ മുകളിൽ പിടിച്ച് കുറേശ്ശെ മാവെടുത്ത് ഒഴിച്ച് കുഞ്ഞുതുളളികളായി തിളച്ച എണ്ണയിലേക്ക് വീണ് മൊരിഞ്ഞു വരുന്നു), വാരിയെടുത്ത് പരന്ന പാത്രത്തിൽ നിരത്തുക.

🌼 വറുത്തു വച്ചിരിക്കുന്ന തേങ്ങയും ചേർത്ത് നന്നായി ഇളക്കുക

🌼 മുകളിലേക്ക് ചൂടുള്ള വെല്ലപ്പാവ് ഒഴിക്കുക.നന്നായി യോജിപ്പിക്കുക. ഒട്ടുന്ന പാകമായിരിക്കും ഇപ്പോൾ ഇത്.

🌼 ഏലയ്ക്ക, ചുക്ക് പൊടിയും പഞ്ചസാരയും ചേർത്ത് നന്നായി ഇളക്കുക.

🌼 രുചികരമായ മനോഹരം തയ്യാർ.

🌼 എന്താ ഒന്നു പരീക്ഷിച്ചു നോക്കാം ല്ലേ. അപ്പോ അടുത്താഴ്ച കാണുന്നതു വരെ 🙏.

ദീപ നായർ (deepz)✍