🌶️🌶️കർണ്ണാടക സ്പെഷ്യൽ കാര കഡുബു

എല്ലാവർക്കും നമസ്‌കാരം

എന്തായാലും സംഭവബഹുലമായ കാലഘട്ടത്തിലൂടെയുള്ള യാത്ര ബഹുരസം അല്ലേ. കൊറോണ ഒന്നാമൻ്റേയും രണ്ടാമൻ്റേയും വിളയാട്ടം കഴിയുമ്പോഴേക്കും ചുഴലിക്കൊടുങ്കാറ്റായി, പേമാരിയായി. ഉലഞ്ഞാടി മുങ്ങിനിവരുമ്പോഴേക്കും മൂന്നാമൻ്റെ വരവായി. ഇതിനിടയിൽ തമിഴൻ്റെ വിരുതും ചില്ലറ കൊലപാതകങ്ങളും പീഠനങ്ങളും മൗനവും വാചാലതയും തോന്ന്യാസങ്ങളും വിലക്കയറ്റവും എല്ലാമാവുമ്പോൾ ചാനലുകൾക്ക് ചാകര, സാധാരണ ജനങ്ങൾ ആകെ സംശയത്തിൽ – നിക്കണോ പോണോ🤔

🌶️🌶️കർണ്ണാടക സ്പെഷ്യൽ കാര കഡുബു

🏵️ആവശ്യമായ സാധനങ്ങൾ

🌶️അരിപ്പൊടി-ഒരു കപ്പ്
🌶️വെള്ളം-ഒന്നര കപ്പ്
🌶️ ഉപ്പ്-പാകത്തിന്
🌶️നെയ്യ്-രണ്ടു ടീസ്പൂൺ
🌶️പാൽ-നാലു ടീസ്പൂൺ
🌶️കടലപ്പരിപ്പ്-അര കപ്പ്
🌶️പച്ചമുളക്-നാലെണ്ണം
🌶️ഇഞ്ചി-രണ്ടിഞ്ചു കഷണം
🌶️മല്ലിയില-ഒരു പിടി
🌶️കാരറ്റ്-ഒരെണ്ണം ഗ്രേറ്റ്‌ ചെയ്തത്
🌶️തേങ്ങ ചിരവിയത്-ഒരു കപ്പ്
🌶️മഞ്ഞൾപ്പൊടി-1/4 ടീസ്പൂൺ
🌶️ഉപ്പ്-പാകത്തിന്

🏵️ഉണ്ടാക്കുന്ന വിധം

🌶️🌶️കടലപ്പരിപ്പ് നന്നായി കഴുകി രണ്ടുമൂന്നു മണിക്കൂർ കുതിർത്തു വയ്ക്കുക.

🌶️🌶️കുതിർത്ത കടലപ്പരിപ്പ്, തേങ്ങ, പച്ചമുളക്, ഇഞ്ചി, മല്ലിയില, മഞ്ഞൾപ്പൊടി, ഉപ്പ് ഇവയെല്ലാം ഒന്നിച്ചാക്കി തരുതരുപ്പായി അരച്ച് കാരറ്റ് ഗ്രേറ്റ് ചെയ്തതു ചേർത്ത് നന്നായി യോജിപ്പിച്ചു വയ്ക്കുക.

🌶️🌶️ ഉപ്പും നെയ്യും പാലും ചേർത്ത് വെള്ളം തിളപ്പിച്ച് അരിപ്പൊടി ചേർത്ത് കുഴച്ചെടുക്കുക.

🌶️🌶️ബോൾ വലുപ്പത്തിൽ ഉരുളയെടുത്ത് ഓയിൽ പേപ്പറിൽ വച്ച് പൂരിയുടെ വലുപ്പത്തിൽ കട്ടിയിൽ കൈകൊണ്ട് പരത്തി നടുവിൽ കുറച്ച് തയ്യാറാക്കിയ മിശ്രിതം വച്ചു മടക്കി അറ്റം ഒട്ടിച്ചു വയ്ക്കുക. ബാക്കിയുള്ള മാവും മിശ്രിതവും കൊണ്ട് ഇതുപോലെ ചെയ്യുക.

🌶️🌶️സ്റ്റീമറിൽ നിരത്തി പന്ത്രണ്ടു-പതിനാലു മിനിറ്റ് ആവിയിൽ വേവിക്കുക

🌶️🌶️വ്യത്യസ്തവും സ്വാദിഷ്ടവും ആരോഗ്യപ്രദവുമായ പലഹാരം കാര കഡുബു തയ്യാറായി.

🌶️🌶️ചൂടോടെ ചട്നിയുടെ കൂടെ വിളമ്പാം.

തയ്യാറാക്കിയത്: ദീപ നായർ(deepz)ബാഗ്ലൂർ✍