17.1 C
New York
Thursday, August 18, 2022
Home Literature ഗാന്ധാരി വിലപിക്കരുത് (കവിത)

ഗാന്ധാരി വിലപിക്കരുത് (കവിത)

ഉദയ് നാരായണൻ, അബുദാബി✍

ജൻമനാ അന്ധനായിരുന്ന സ്വന്തം ജീവിത പങ്കാളിക്ക് ജീവസ്സുറ്റ നേത്രമായി വരും കാലങ്ങളിൽ, വാഴ് വിന്റെ അറ്റം വരെ കഴിയേണ്ടവൾ ഏതു പേരിൽ വാഴ്ത്തപ്പെട്ടാലും ബന്ധിതനേത്രയായത്,കണ്മുൻപിൽ കണ്ണായി വളരും മക്കളുടെ കൈയ്മെയ്യ് വളരുന്നത് കൺകുളിരേ കാണുന്നതിന് സ്വയം തടയിട്ടത്. ഇത്യാദികളിൽ നിന്ന് രൂപം കൊണ്ട പാപശില – ദുർലക്ഷണങ്ങളോടെ ജന്മമെടുത്ത പ്രഥമ പുത്രനെ, ദുര്യോധനനെ ഭൂമിയിൽ സർവ്വനാശം വിതയ്ക്കുന്നതിനാൽ വേണ്ടെന്നു വെയ്ക്കുവാൻ ദീർഘ വീക്ഷണമുള്ളവരും മഹാജ്ഞാനികളുമായ വ്യാസവിദുരഭീഷ്മ ഉപദേശങ്ങൾ നിരാകരിക്കുവാനുള്ള അൽപപ്രജ്ഞ,അധർമ്മികളായ പുത്രരുടെ അസൻമ്മാർഗ്ഗികവും,അസ്വാഭാവികവുമായ വളർച്ച കാണാതെ പോയത്, ഒടുവിൽ ആസന്നമായ യുദ്ധാന്തരീക്ഷത്തിൽ വ്യാസൻ, വിദുരർ,മഹാതപസ്വിയായ സനത്ക്കുമാരമഹർഷി എന്നിവരുടെ യുദ്ധം ഒഴിവാക്കുവാനുള്ള സദുപദേശങ്ങൾ അസ്വീകാര്യമായത്, കൃഷ്ണദൂതിന്റെ പരാജയം ഒക്കെയും തലയ്ക്കു മീതെ പാപ ശൈലമായി വളർന്നത് അറിഞ്ഞിട്ടും അറിയാതിരുന്ന ഗാന്ധാരീ.. കാംക്ഷിച്ച അധർമ്മ വിജയം കൈവരിക്കാത്തതിൽ ഇങ്ങിനെയുള്ള ഗാന്ധാരിമാർ വിലപിക്കരുത്, പൊഴിക്കരുത് ഒരിറ്റു കണ്ണീർപോലും…………

ഗാന്ധാരി വിലപിക്കരുത്

അശ്രുകൊണ്ടെഴുതിയതല്ല
ഗാന്ധാരീ, നിന്നശ്രുകൊണ്ടെഴുതിയതല്ല
വ്യാസകൃതി വ്യഥന മഹാഭാരതം,
പരിതാപം പലവഴിയൊഴുകുന്ന
പതിനെട്ടു പർവ്വങ്ങൾ.

പാതിവ്രത്യബലം
പർവ്വത സമാനമെങ്കിലും
പരിവാര പരിപാലനം,
പുത്ര പരിലാളനം പാഴ്ശ്രമം,
പാമരേ നീ വെറും പരാജിത!

ഹേയ്.. സുബലപുത്രീ
നീയറിഞ്ഞിരുന്നില്ലേ
കളിബാല്യത്തിലേ കൗരവക്കൂട്ടം
കാളകൂട വിഷമേകിയും
കാട്ടുവള്ളികളാൽ ബന്ധിച്ചും
ഭീമനോടുള്ള ക്രൂര കേളികൾ,
പരംപൊരുളുംപൊറുക്കാത്ത
പാപക്കനിയതു പെറ്റുപെരുകിയല്ലേ
പോർക്കളത്തിൽവലലൻ,വായുപുത്രൻ
നേരില്ലാ നൂറ്റവരെ നേരിട്ടു
നിഷ്ക്കരുണം കാലപുരി കാട്ടിയത്

അകക്കണ്ണലറിഞ്ഞു നീ
അരക്കില്ലം ചുട്ടതും,
അഞ്ചു സോദരരുമമ്മയും
അഗ്നി പുണരാതെ,
അകാല മൃത്യു പുണരാതെ,
വിധിഹിതം പോലെ വഹ്നി-
കവചം പോലെ വിദുരരും.

ദുഷ്ടനാം ദുശ്ശാസനന്റെയു-
ദരപാളി കീറി രുധിര ഹസ്തനായ്
കുതിക്കും കുന്തീപുത്രനെ
സ്വയമന്ധയാം നീയറിഞ്ഞെങ്കിലുമ-
റിഞ്ഞതേയില്ല കള്ളച്ചൂതിൻ
കറുത്ത കരങ്ങളാലബലയാം
നാരിതൻ വസ്ത്രാക്ഷേപം.!

വരും കാല ഭീകര വ്യഥയകറ്റാൻ
ഭീഷ്മോപദേശങ്ങളും
വ്യാസ സഞ്ജയ വിദുരവാക്യങ്ങളും,
അർദ്ധരാജ്യം,അഞ്ചു ചെറുരാജ്യങ്ങൾ,
അഞ്ചു ദേശങ്ങൾ,അഞ്ചു ഗൃഹങ്ങൾ,
അഞ്ചുപേർക്കഞ്ചു വേണ്ടൊരു
ഗൃഹമെങ്കിലുമെന്നയജ്ഞന-
വർണ്ണന്റൻപോടെയുള്ളൊരഭിമതവു-
മൊക്കെയുമന്ധനാം നിൻ പാതിയാം
പതിയുമന്തരംഗത്തിലഹന്താന്ധനാം
പ്രഥമ പുത്രനുംപാടേ പുറംതള്ളി
പകയോടെ പടയൊരുക്കംതുടങ്ങിയ-
തുമറിഞ്ഞില്ലേ നിൻ മനോമണ്ഡലം.

ആശിച്ചുവാങ്ങി നീയന്ധതയെങ്കിലു-
മറിവറിയാൻ കാതില്ലേ,യലിവുള്ള-
യറിവുള്ളോർമൊഴിഞ്ഞില്ലേ-
യനുഭവം പങ്കുവെച്ചുപദേശിച്ചില്ലേ-
യാദ്യപുത്രനന്ധകാരം വിതയ്ക്കും
വിശുദ്ധ ഹസ്തിനപുരിയിൽ
സർവ്വ ഹർഷഹരനീ ഹതദൈവ ജന്മം.

എത്രയക്ഷൗഹിണിപ്പടകളെയ-
വിളംബമധർമ്മികളാക്കി
കുരുക്ഷേത്രക്കുരിതിയൊരുക്കി,
യെത്ര ചിറകറ്റ സ്വപ്‌നങ്ങൾ
ചോരക്കളത്തിൽ ചത്തുവീണെ-
ത്രമങ്കമാർ മംഗല്യസൂത്രം
മാറോടടുക്കി മാറത്തടിച്ചു നിലവിളിച്ചു !

മാതൃധർമ്മം മനുജകർമ്മം മറന്നമ്മ നീ,
മൃതിയിലും മക്കളെയറിയാത്തവൾ
എന്നിട്ടുമെന്തിനു മനംനൊന്തു
മുകുന്ദന്റെ മനമറിയാതെ
മാധവധർമ്മ കർമ്മത്തിലജ്ഞത നടിച്ചു,
ശഠിച്ചു,പിന്നെ ശപിച്ചു..!

ഇത്ഥമിന്നുമേറെ ഗാന്ധാരിമാർ
പെറ്റുപോറ്റുന്നു പോരിനായ് മക്കളെ
പര പത്തുകാശിനും പേരിനും പെണ്ണിനും
പത്മവ്യൂഹം പണിയും പരസ്പരം
ചത്തുവീഴുന്നു പട്ടിപോൽ,പിന്നെ
പട്ടുപുതക്കുന്നു പട്ടടയൊരുക്കുന്നു..

ഉദയ് നാരായണൻ, അബുദാബി✍

Facebook Comments

COMMENTS

- Advertisment -

Most Popular

ടെക്സസ്സിൽ റിയൽ എസ്റ്റേറ്റ് ഏജന്റിനെ കുത്തി കൊലപ്പെടുത്തിയ പ്രതിയുടെ വധശിക്ഷ നടപ്പാക്കി

ഹണ്ട്സ് വില്ല(ടെക്സസ്): പതിനാറു വർഷങ്ങൾക്കു മുമ്പു ടെക്സസ്സിൽ റിയൽ എസ്റ്റേറ്റ് ഏജന്റിനെ കുത്തികൊലപ്പെടുത്തിയ കേസ്സിൽ പ്രതിയായ കോസുള്‍ ചന്ദകൊമേനെ എന്ന നാൽപത്തിയൊന്നുകാരന്റെ വധശിക്ഷ ടെക്സസ് ഹണ്ട്സ് വില്ലയിൽ ആഗസ്റ്റ് 17 ബുധനാഴ്ച 6...

പ്രവർത്തന മികവിന്റെ അനുഭവ സമ്പത്തുമായി ഫോമയുടെ ജനറൽ സെക്രട്ടറി സ്ഥാനാർത്ഥിയായി ഓജസ് ജോൺ.

ഫോമായുടെ 2022-24 വർഷത്തെ ജനറൽ സെക്രട്ടറി ആയി ഫ്രണ്ട്‌സ് ഓഫ് ഫോമാ പാനലിൽ മത്സരരംഗത്തേയ്ക്ക് എത്തുന്നത് വരെ സമൂഹത്തിനു വേണ്ടിയും അതിലുപരി ഫോമയ്‌ക്കു വേണ്ടിയും നടത്തിയ പ്രവർത്തങ്ങളും, നമ്മുടെ സമൂഹത്തിന്റെ ഉന്നമനത്തിനായി നൽകിയ...

ഒഐസിസി സാൻഫ്രാൻസിസ്‌കോ: പ്രവർത്തനോത്ഘാടനവും ഇന്ത്യൻ സ്വാതന്ത്ര്യദിനാഘോഷവും വർണാഭമായി.

സാൻഫ്രാൻസിസ്‌കോ: ഓവർസീസ് ഇന്ത്യൻ കൾച്ചറൽ കോൺഗ്രസ് (ഒഐസിസി യൂഎസ്എ) സാൻഫ്രാൻസിസ്‌കോ ചാപ്റ്ററിന്റെ പ്രവർത്തനോത്‌ഘാടനവും ഇന്ത്യൻ സ്വാതന്ത്ര്യദിന പ്ലാറ്റിനം ജൂബിലി ആഘോഷവും ആഗസ്റ്റ് 14 ന് ഞായറാഴ്ച വൈകുന്നേരം വൈവിധ്യമാർന്ന ചടങ്ങുകളോടെ നടത്തി. മന്റെക്ക ഗ്രീൻവാലി...

ഫിലിപ്പ് ജോൺ അന്തരിച്ചു.

ഡാലസ്: പത്തനംത്തിട്ട തടിയൂർ പൂഴിക്കാലയിൽ ഫിലിപ്പ് ജോൺ (കുഞ്ഞുമോൻ 86) ഡാലസിൽ നിര്യാതനായി. തിരുവല്ലാ കാവുംഭാഗം ചെത്തിക്കാട് കുടുംബാംഗമായ സൂസി ജോൺ ആണ് ഭാര്യ. മക്കൾ: ഫിൽജി ജോൺസ് (ടെന്നസി), ജിജി ജോൺ, ജെസ്സി...
Facebook Comments
WP2Social Auto Publish Powered By : XYZScripts.com
error: