പത്തനംതിട്ട: ശബരിമല നട ജനുവരി 20 ന് അടയ്ക്കും. ജനുവരി 19 വരെ തീർഥാടകർക്ക് അയ്യപ്പ ദർശനം നടത്താൻ അവസരമുണ്ടാകും. 19ന് വൈകുന്നേരം ആറുമണിവരെ തീർഥാടകരെ പമ്പയിൽ നിന്ന് സന്നിധാനത്തേക്ക് കടത്തിവിടും. തുടർന്ന് അത്താഴ പൂജയ്ക്കു ശേഷം മണിമണ്ഡപത്തിന് മുൻപിൽ നടക്കുന്ന ഗുരുതിയോടെ മകരവിളക്ക് തീർഥാടനം സമാപിക്കും.
ജനുവരി 20ന് പന്തളം രാജപ്രതിനിധിക്ക് മാത്രമാണ് ദർശനം. രാവിലെ തിരുവാഭരണ മടക്കഘോഷയാത്ര പുറപ്പെടും. 5.30ന് ഗണപതി ഹോമത്തിനു ശേഷമാന് യാത്ര പുറപ്പെടുക. രാജപ്രതിനിധിയുടെ ദർശനത്തിന് ശേഷം മേൽശാന്തി അയ്യപ്പവിഗ്രഹത്തിൽ വിഭൂതിയഭിഷേകം നടത്തി ഹരിവരാസനം ചൊല്ലി നട അടയ്ക്കും.
പരാതിരഹിത മണ്ഡല മകരവിളക്ക് തീര്‍ഥാടനത്തിനാണ് ഇത്തവണ കേരളം സാക്ഷ്യം വഹിച്ചത്. ശബരിമല സീസണ്‍ ആരംഭിക്കുന്നതിനുമുമ്പ് ആശങ്കകള്‍ പ്രതിപക്ഷ നേതാക്കള്‍ പങ്കുവെച്ചിരുന്നു. ചിലര്‍ സുവര്‍ണ്ണാവസരം തുറക്കപ്പെടും എന്നും കരുതിയിരുന്നു. എന്നാല്‍ ഈ വര്‍ഷത്തെ മണ്ഡല മകരവിളക്ക് തീര്‍ഥാടനം പൂര്‍ത്തിയാകുമ്പോള്‍ ഒരു കോണില്‍ നിന്ന് പോലും പരാതി ഉയര്‍ന്നില്ല. ശബരിമലയില്‍ എത്തിയ എല്ലാവര്‍ക്കും സുഖദര്‍ശനം സാധ്യമാകുന്ന തരത്തില്‍ ആയിരുന്നു ദേവസ്വം ബോര്‍ഡിന്റെയും സംസ്ഥാന സര്‍ക്കാരിന്റെയും മുന്നൊരുക്കങ്ങള്‍.
ഇത്തവണത്തെ ശബരിമല തീർഥാടനം ഭംഗിയായാണ് സമാപിച്ചതെന്ന് മുഖ്യമന്ത്രി പിണറായി വിജയൻ കഴിഞ്ഞ ദിവസം വ്യക്തമാക്കിയിരുന്നു. ഈ സീസണിൽ അരക്കോടിയോളം പേരാണ് ശബരിമല സന്ദർശിച്ചത്. പ്രതിദിനം 90000ന് മുകളിൽ തീർത്ഥാടകർ എത്തിയിട്ടുണ്ട്. അതിൽ പല ദിവസങ്ങളിലെയും കണക്ക് ഒരു ലക്ഷത്തിന് മുകളിലാണ്.
അയ്യപ്പഭക്തർക്ക് ഒരു ബുദ്ധിമുട്ടും ഇല്ലാതെ തീർഥാടനം സാധ്യമാക്കുന്നതിനുള്ള വിപുലമായ ക്രമീകരണങ്ങളാണ് സംസ്ഥാന സർക്കാരും ദേവസ്വം ബോർഡും ചേർന്ന് ഒരുക്കിയത്. അതിൽ ഭക്തർ സംതൃപ്തരാണ് എന്നാണ് മനസ്സിലാക്കുന്നത്. തീർഥാടന ക്രമീകരണങ്ങളിൽ അനുഭവസമ്പന്നരെ ഉൾപ്പെടുത്തി വരുത്തിയ മാറ്റങ്ങളും, വെർച്വൽ ക്യൂവും ഒപ്പം തത്സമയ ബുക്കിങ് ഏർപ്പെടുത്തിയതും മണിക്കൂറുകൾ നീളാതെ ദർശന സൗകര്യം ലഭ്യമാക്കിയതുമൊക്കെ സുഖദർശനത്തിന് ഇടയാക്കിയ കാരണങ്ങളാണ്. തീർഥാടന സീസൺ വിജയപ്രദമാക്കിയ എല്ലാവരെയും അഭിനന്ദിക്കുന്നതായി മുഖ്യമന്ത്രി പറഞ്ഞിരുന്നു.
ഈ ഒരു തീർഥാടനകാലം മാത്രം ലക്ഷ്യമിട്ടല്ല 25 വർഷം മുന്നിൽ കണ്ടുള്ള പദ്ധതികളാണ് സർക്കാർ വിഭാവനം ചെയ്തിരിക്കുന്നത്. സന്നിധാനത്തിന്റെ ആത്മീയവും സാംസ്‌കാരികവുമായ പൈതൃകത്തെ മാനിച്ചുകൊണ്ട് തയ്യാറാക്കിയ ലേഔട്ട് പ്ലാനിന് മന്ത്രിസഭ അംഗീകാരം നൽകി കഴിഞ്ഞുവെന്ന് മുഖ്യമന്ത്രി അറിയിച്ചു
