തിരുവനന്തപുരം: സിപിഎം വിട്ട മംഗലപുരം മുൻ ഏരിയ സെക്രട്ടറി മധു മുല്ലശേരിയെ ബിജെപിയിലേക്ക് സ്വീകരിച്ച് നേതാക്കൾ. കേന്ദ്രമന്ത്രി സുരേഷ് ഗോപി, വി മുരളീധരൻ, വിവി രാജേഷ് തുടങ്ങിയവർ മധുവിൻ്റെ വസതിയിലെത്തി പാർട്ടിയിലേക്ക് സ്വീകരിച്ചു. ബുധനാഴ്ച രാവിലെ ബിജെപി സംസ്ഥാന കമ്മിറ്റി ഓഫീസിൽവെച്ച് സംസ്ഥാന അധ്യക്ഷൻ കെ സുരേന്ദ്രൻ അംഗത്വം നൽകും. പ്രധാനമന്ത്രി നരേന്ദ്ര മോദിയുടെ പ്രവർത്തനങ്ങളിൽ ആകൃഷ്ടനായാണ് ബിജെപിയിൽ ചേരുന്നതെന്ന് മധു മുല്ലശേരി മാധ്യമങ്ങളോട് പറഞ്ഞു.
“പ്രധാനമന്ത്രി മോദിജിയുടെ പ്രവർത്തനങ്ങൾ വലുതാണ്. അതിലൂടെ ഇന്ത്യയ്ക്കുണ്ടായ വളർച്ച വലുതാണ്. മൂന്ന് തവണയായി കേന്ദ്രം ഭരിക്കുന്ന സർക്കാരിൻ്റെ പ്രവർത്തനങ്ങളിൽ ആകൃഷ്ടനായാണ് ബിജെപിയിലേക്ക് കടന്നുവരാൻ തീരുമാനിച്ചത്. നിരവധി തവണ വ്യക്തമായി ആലോചിച്ച ശേഷമാണ് ബിജെപിയിൽ അംഗത്വം എടുക്കുന്നത്. എൻ്റെ കുടുംബവും എന്നോടൊപ്പമുണ്ട്. ഈ പ്രദേശത്തെ നിരവധി പാർട്ടി പ്രവർത്തകരും സിപിഎം ലോക്കൽ കമ്മിറ്റിയംഗമായ എൻ്റെ മകൻ മിഥുനും എന്നോടൊപ്പമുണ്ട്. ആരും എൻ്റെ കൂടെ വരില്ലെന്നാണ് സിപിഎം നേതൃത്വം പറഞ്ഞത്. എന്നാൽ നിരവധി പാർട്ടി അംഗങ്ങൾ എന്നോടൊപ്പം വന്നിട്ടുണ്ട്” – മധു മുല്ലശേരി പറഞ്ഞു.
കോൺഗ്രസ്, മുസ്ലീം ലിഗ് നേതാക്കളും പിവി അൻവറും തന്നെ ബന്ധപ്പെട്ടിരുന്നു. നരേന്ദ്ര മോദി നടത്തിയ വികസന പ്രവർത്തനങ്ങളാണ് തന്നെ ആകർഷിച്ചത്. കേരളത്തിൻ്റെ ഇന്നത്തെ സ്ഥിതിയെന്താണ്. പെൻഷൻ കൊടുക്കാനും ലൈഫ് പദ്ധതി നടപ്പാക്കാനും കഴിയുന്നിലല്ലോ. എന്ത് വികസനമാണ് ഇവർ നടത്തുന്നത്. ഇത്ര നിഷേധാത്മകമായ രീതിയിൽ കാര്യങ്ങൾ നടത്തുന്ന സർക്കാരുണ്ടോയെന്നും മധു മുല്ലശേരി ചോദിച്ചു.
ഏരിയ സമ്മേളനത്തിന് മുൻപേ പാർട്ടി വിടാൻ തീരുമാനിച്ചിരുന്നതായും അദ്ദേഹം പറഞ്ഞു. സിപിഎമ്മിനുള്ളിൽ താൻ നേരിടുന്ന അവഗണന വലുതായിരുന്നു വെന്നും മധു മുല്ലശേരി കൂട്ടിച്ചേർത്തു.
മംഗലപുരം ഏരിയാ സമ്മേളനത്തിൽനിന്ന് ഏരിയാ സെക്രട്ടറിയായിരുന്ന മധു മുല്ലശേരി ഇറങ്ങിപ്പോയത് ചർച്ചയായിരുന്നു. സിപിഎം ജില്ലാ നേതൃത്വത്തിനെതിരെ രൂക്ഷവിമർശനം ഉന്നയിച്ചായിരുന്നു മധുവിൻ്റെ പടിയിറക്കം. ജില്ലാ സെക്രട്ടറി വി ജോയിക്കെതിരെ മാധ്യമങ്ങളിലൂടെ ഗുരുതര ആരോപണമാണ് മധു ഉന്നയിച്ചത്. മധു ബിജെപിയിൽ പ്രവേശിക്കുന്ന സൂചന ഉണ്ടായതോടെ ഇന്ന് രാവിലെ അദ്ദേഹത്തെ പാർട്ടിയുടെ പ്രാഥമിക അംഗത്വത്തിൽനിന്ന് സിപിഎം പുറത്താക്കി.
മംഗലപുരം ഏരിയാ സമ്മേളനവുമായി ബന്ധപ്പെട്ട് പാർട്ടി തത്വങ്ങൾക്ക് വിരുദ്ധമായി പ്രവർത്തിക്കുകയും പൊതുമധ്യത്തിൽ പാർട്ടിയെ അപകീർത്തപ്പെടുത്തുകയും ചെയ്തതിൻ്റെ അടിസ്ഥാനത്തിലാണ് നടപടിയെന്ന് ജില്ലാ സെക്രട്ടറി വി ജോയി അറിയിച്ചു.
