കോഴിക്കോട്: യുഡിഎഫ് വിപുലീകരണം സംബന്ധിച്ച് ഇപ്പോള്‍ ചര്‍ച്ച നടത്തേണ്ടെന്നാണ് വി ഡി സതീശന്‍ പറഞ്ഞതെന്ന് കോണ്‍ഗ്രസ് നേതാവ് കെ മുരളീധരന്‍. സമാനമനസ്‌കരായ എല്ലാവരും ഒന്നിക്കണമെന്നാണ് കോഴിക്കോട് ചേര്‍ന്ന ചിന്തന്‍ ശിബിരത്തിലെടുത്ത തീരുമാനം. നിലവിലെ സാഹചര്യത്തില്‍ യുഡിഎഫിന് യാതൊരു ഭയവുമില്ല. മുന്നണി ജയിക്കാന്‍ തങ്ങള്‍ പ്രാപ്തരാണെന്നും കെ മുരളീധരന്‍ പ്രതികരിച്ചു.
സിപിഐഎം ഇടയ്ക്കിടെ ലീഗിനെ ക്ഷണിക്കുന്നത് അവര്‍ അടുത്ത ഇലക്ഷനില്‍ ജയിക്കില്ല എന്ന വിശ്വാസം ഉള്ളതുകൊണ്ടാണെന്നും മുരളീധരന്‍ വിമര്‍ശിച്ചു. സംസ്ഥാനത്തിന്റെ വിശാല താല്‍പര്യം കൂടെ കണക്കിലെടുത്താണ് വിട്ടു പോയവര്‍ തിരിച്ചു വരണമെന്ന് തങ്ങള്‍ ആഗ്രഹിക്കുന്നത്. മടിയില്‍ കനമുള്ളത് കൊണ്ടാണ് എഐ ക്യാമറ ആരോപണങ്ങളില്‍ മുഖ്യമന്ത്രി പ്രതികരിക്കാത്തതെന്നും മുരളീധരന്‍ ആരോപിച്ചു.
വലിയ താമസമില്ലാതെ മുഖ്യമന്ത്രിക്ക് വായ തുറക്കേണ്ടി വരും. നിയമവിദഗ്ധരുമായി ചര്‍ച്ച നടത്തേണ്ടി വരും. കോടതിയില്‍ പോരും. എഐ ക്യാമറ വിഷയത്തില്‍ തന്നെയാകും എല്‍ഡിഎഫ് സര്‍ക്കാരിന്റെ പതനം’, കെ മുരളീധരന്‍ വിമര്‍ശിച്ചു. കര്‍ണാടകയില്‍ മുഖ്യമന്ത്രിപദം സംബന്ധിച്ച് ഒരു തര്‍ക്കവുമില്ലെന്നും അദ്ദേഹം പറഞ്ഞു.
ഇത് പതിവുള്ളതാണ്. സര്‍ക്കാര്‍ അധികാരത്തില്‍ വരാന്‍ ഒരാഴ്ച സമയമെടുക്കുന്നത് ഇത്ര വലിയ അത്ഭുതമാണോ? യുപിയിലും ഗുജറാത്തിലും എത്ര സമയമെടുത്തിട്ടുണ്ട്. കേരളത്തിലെ സിപിഐഎമ്മിലെ ജന്മി-കുടിയാന്‍ ബന്ധമല്ല കോണ്‍ഗ്രസിലുള്ളത്’, മുരളീധരന്‍ കൂട്ടിച്ചേര്‍ത്തു.
