രമേശ് ചെന്നിത്തല നയിക്കുന്ന ഐശ്വര്യ കേരള യാത്ര കോട്ടയത്ത് പര്യടനം തുടരുന്നു. പാലായിൽ നടന്ന സ്വീകരണ പരിപാടിയിൽ മാണി സി കാപ്പൻ എം എൽ എ പങ്കെടുത്തു. പുതിയ പാർട്ടി രൂപീകരിച്ചാണ് കാപ്പൻ യുഡിഎഫിനൊപ്പം ചേരുന്നത്.
ഐശ്വര്യ കേരള യാത്രയുടെ പര്യടനത്തിലെ ഏറ്റവും ശ്രദ്ധേയമായ ദിനമായിരുന്നു ഇന്ന്. എൻസിപി വിട്ട മാണി സി കാപ്പൻ എം എൽ എ പാലായിൽ നടന്ന സ്വീകരണ പരിപാടിയിൽ പങ്കെടുത്തു. ശക്തി തെളിയിച്ചു കൊണ്ടായിരുന്നു കാപ്പൻ്റെ വേദിയിലേക്കുള്ള വരവ്.
പ്രസംഗത്തിൽ ജോസ് കെ മാണിയെ കടന്നാക്രമിച്ചു കാപ്പൻ .പാലാ കേരളാ കോൺഗ്രസിൻ്റെ വത്തിക്കാനാണെങ്കിൽ അവിടുത്തെ പോപ്പ് താനാണെന്നും ജോസ് കെ മാണി ജൂനിയർ മാൻഡ്രേക്കാണെന്നും കാപ്പൻ പറഞ്ഞു.
ഇടതുപക്ഷം മുങ്ങുന്ന കപ്പലാണെന്നും കാപ്പൻ അതിൽ നിന്നും രക്ഷപ്പെട്ടിരിക്കുന്നെന്നും പ്രതിപക്ഷ നേതാവ് രമേശ് ചെന്നിത്തല.
ഉമ്മൻചാണ്ടി, പി കെ കുഞ്ഞാലിക്കുട്ടി, പി.ജെ ജോസഫ് തുടങ്ങിയ മുതിർന്ന നേതാക്കളും പരിപാടിയിൽ പങ്കെടുത്തു. നാളെയും ഐശ്വര്യ കേരളയാത്ര കോട്ടയം ജില്ലയിൽ പര്യടനം നടത്തും.
