📱വാർത്തകൾ ഒറ്റനോട്ടത്തിൽ📱 – 2026 | ജൂൺ 14 | ഞായർ ✍️ കപിൽ ശങ്കർ

🔹കോഴിക്കോട് നിപ ആശങ്കയില്‍ ആശ്വാസമായി സമ്പര്‍ക്കപ്പട്ടികയിലുള്ള 3 പേരുടെ പരിശോധന ഫലം നെഗറ്റീവായി. നിലവില്‍ 100 പേരാണ് സമ്പര്‍ക്ക പട്ടികയിലുള്ളത്. കണ്‍ട്രോള്‍ റൂം കാര്യക്ഷമമല്ലെന്ന മുഹമ്മദ് റിയാസിന്റെ ആരോപണത്തിന് ആരോഗ്യമന്ത്രി കെ മുരളീധരന്‍ മറുപടി നല്‍കി. നിപ സമ്പര്‍ക്കപ്പടികയില്‍ ഉള്‍പ്പെട്ട 76 പേരെ ഫോണില്‍ വിളിച്ച് മാനസിക പിന്തുണ നല്‍കിയെന്നും കണ്‍ട്രോള്‍ റൂമിലേക്ക് വന്ന 30 ഫോണ്‍ കോളുകള്‍ക്ക് മറുപടി നല്‍കിയെന്നും മന്ത്രി വ്യക്തമാക്കി.

🔹നിപയില്‍ ഭയപ്പെടേണ്ട സാഹചര്യമില്ലെന്ന് വ്യവസായവകുപ്പ് മന്ത്രി പികെ കുഞ്ഞാലിക്കുട്ടി. ആരോഗ്യമന്ത്രി ഇന്ന് കോഴിക്കോടെത്തും. പ്രതിരോധം പാളിയിട്ടില്ല, സാഹചര്യം നിയന്ത്രണ വിധേയമാണ്. പാളാതെ പാളിയെന്ന് പറഞ്ഞിട്ട് കാര്യമില്ല. സര്‍ക്കാരിന് ചെയ്യാവുന്ന കാര്യങ്ങളൊക്കെ തുടക്കം മുതല്‍ ചെയ്യുന്നുണ്ട് എന്നും അദ്ദേഹം പ്രതികരിച്ചു.

🔹കോഴിക്കോട്ടെ നിപ പ്രതിരോധ പ്രവര്‍ത്തനങ്ങളില്‍ ആരോഗ്യ വകുപ്പിന് വീഴ്ച പറ്റിയെന്ന് ഡിവൈഎഫ്‌ഐ സംസ്ഥാന പ്രസിഡന്റ് വി. വസീഫ് ആരോപിച്ചു. ആരോഗ്യ മന്ത്രിയുടെ പരിചയക്കുറവാണ് ഇതിന് കാരണമെന്നും, രാഷ്ട്രീയ താല്പര്യങ്ങള്‍ക്കായി പി.എ മുഹമ്മദ് റിയാസിനെ മാറ്റി നിര്‍ത്തിയെന്നും അദ്ദേഹം കുറ്റപ്പെടുത്തി.

🔹പാലക്കാട് ഡെങ്കിപ്പനി ബാധിച്ച് ഒരു മരണം. കരിമ്പുഴ പഞ്ചായത്തിലെ പൊമ്പ്ര അമ്പലംപാടം കന്നിച്ചാലില്‍ മറിയ (62) ആണ് മരിച്ചത്. അതേസമയം തൃശൂരില്‍ ഷിഗെല്ല റിപ്പോര്‍ട്ട് ചെയ്തു. വടക്കാഞ്ചേരി മംഗലത്ത് ഏഴും നാലും വയസ്സുള്ള രണ്ടു കുട്ടികള്‍ക്കാണ് രോഗബാധ. തൃശ്ശൂര്‍ മെഡിക്കല്‍ കോളേജിലാണ് കുട്ടികള്‍ ചികിത്സയില്‍ ഉള്ളത്.

🔹ആരോഗ്യവകുപ്പ് ഡയറക്ടര്‍ ഡോ. കെ. റീനയെ സ്ഥലം മാറ്റിയതിനെതിരെ മുന്‍ ആരോഗ്യമന്ത്രി കെകെ ശൈലജ രംഗത്ത്. നിപ, കൊവിഡ് കാലത്ത് മികച്ച പ്രവര്‍ത്തനം നടത്തിയ ഡോക്ടറെ ഈ ഘട്ടത്തില്‍ മാറ്റരുതായിരുന്നുവെന്ന് ശൈലജ അഭിപ്രായപ്പെട്ടു. സര്‍ക്കാരിനെ പൂര്‍ണ്ണമായി കുറ്റപ്പെടുത്താന്‍ ഈ ഘട്ടത്തില്‍ താന്‍ ആഗ്രഹിക്കുന്നില്ലെന്നും ശൈലജ കൂട്ടിച്ചേര്‍ത്തു.

🔹സര്‍ക്കാര്‍ ജീവനക്കാര്‍ക്കായി ബജറ്റില്‍ വിസ്മയം ഒരുക്കുമെന്ന വി.ഡി. സതീശന്‍ സര്‍ക്കാരിന്റെ വാഗ്ദാനത്തില്‍ പ്രതീക്ഷയര്‍പ്പിച്ച് ജീവനക്കാര്‍. പെന്‍ഷന്‍ പ്രായം വര്‍ധിപ്പിക്കില്ലെങ്കിലും, ഒരു ഗഡു ക്ഷാമബത്ത മുന്‍കാല പ്രാബല്യത്തോടെ നല്‍കാനുള്ള പ്രഖ്യാപനം ബജറ്റിലുണ്ടായേക്കുമെന്നാണ് സൂചന.

🔹ഇ. ശ്രീധരന്‍ മുന്നോട്ട് വെച്ച അതിവേഗ പാത കേരളത്തിന്റെ ആവശ്യങ്ങള്‍ക്ക് നിരക്കാത്ത പദ്ധതിയാണെന്ന് കെ റെയില്‍ വിരുദ്ധ ജനകീയ സമിതി. വേഗത പ്രശ്നം പരിഹരിക്കാന്‍ നിലവിലുള്ള റെയില്‍വേയുടെ സാധ്യതകള്‍ ഉപയോഗപ്പെടുത്തണമെന്നും സമിതി ജാഗ്രത സമിതിയായി തുടരുമെന്നും സില്‍വര്‍ ലൈനിനു സമാനമായ പദ്ധതി എങ്കില്‍ എതിര്‍ക്കുമെന്നും സമിതി അറിയിച്ചു.

🔹ഹോട്ടലില്‍ നിന്ന് പൊറോട്ടയും ബീഫ് ഫ്രൈയും വാങ്ങിയപ്പോള്‍ ഗ്രേവി നല്‍കാതിരുന്നതുമായി ബന്ധപ്പെട്ട് എറണാകുളം സ്വദേശിയായ എസ് ഷിബു നല്‍കിയ പരാതി വീണ്ടും പരിഗണിക്കണമെന്ന് സംസ്ഥാന ഉപഭോക്തൃ തര്‍ക്കപരിഹാര കമ്മീഷന്‍ നിര്‍ദേശിച്ചു. പരാതി തള്ളിയ എറണാകുളം ജില്ലാ ഉപഭോക്തൃ കമ്മീഷന്റെ ഉത്തരവ് ഇതിനായി റദ്ദാക്കി.

🔹മുന്‍ മന്ത്രി കെ ടി ജലീലും ഭാര്യ ഫാത്തിമക്കുട്ടിയും സിപിഎമ്മില്‍ അംഗത്വം സ്വീകരിച്ചു. ഇഎംഎസിന്റെ ലോകം ദേശീയ സെമിനാറില്‍ വെച്ച് പിണറായി വിജയനാണ് ഇരുവരെയും പാര്‍ട്ടിയിലേക്ക് സ്വീകരിച്ചത്. 2006 മുതല്‍ പാര്‍ട്ടിയുടെ സഹയാത്രികനായിരുന്ന ജലീല്‍, തെരഞ്ഞെടുപ്പ് തോല്‍വിക്ക് പിന്നാലെയാണ് അംഗത്വമെടുക്കാന്‍ താല്‍പര്യം അറിയിച്ചത്.

🔹കണ്ണങ്കര ചിറക്കല്‍ ഗൗരിശങ്കര ക്ഷേത്രത്തില്‍ സ്വര്‍ണ്ണാഭരണങ്ങള്‍ കവര്‍ന്ന കേസില്‍ ക്ഷേത്രത്തിലെ കീഴ്ശാന്തിയെ പൊലീസ് അറസ്റ്റ് ചെയ്തു. തമിഴ്നാട് ഡിണ്ടിഗല്‍ പളനി സ്വദേശിയായ ശശിധരനാണ് (69) മുഹമ്മ പൊലീസിന്റെ പിടിയിലായത്. 2025 ഡിസംബര്‍ 31-ന് വൈകിട്ട് മേല്‍ശാന്തി ശ്രീകോവില്‍ അടച്ചുപോയ സമയത്താണ് പ്രതി ഉള്ളില്‍ക്കടന്ന് മോഷണം നടത്തിയത്.

🔹നാലു മാസമായി മുടങ്ങിയ വിനോദിനിയുടെ ധനസഹായം മുഖ്യമന്ത്രിയുടെ ഇടപെടലിനെ തുടര്‍ന്ന് പുനഃസ്ഥാപിക്കാന്‍ തീരുമാനമായി. വനിതാ ശിശുക്ഷേമ വകുപ്പ് കുടിശിക ഉടന്‍ നല്‍കുമെന്ന് അറിയിച്ചു. ഇതിനിടെ, വിനോദിനിക്ക് പ്രായപൂര്‍ത്തിയാകുമ്പോള്‍ സര്‍ക്കാര്‍ ജോലി നല്‍കണമെന്ന് ബാലാവകാശ കമ്മീഷന്‍ ശുപാര്‍ശ ചെയ്യുകയും ചെയ്തു.

🔹ഇന്ത്യ മുന്നണി യോഗത്തിലെ രാഹുല്‍ ഗാന്ധിയുടെ പ്രസംഗം മാത്രം പുറത്തുവിട്ടതിലടക്കം പ്രതിഷേധം വ്യക്തമാക്കി യോഗത്തില്‍ പങ്കെടുത്ത സി പി എം പ്രതിനിധി ജോണ്‍ ബ്രിട്ടാസ് എം പി. മൂന്ന് മണിക്കൂര്‍ നീണ്ട ചര്‍ച്ചകളില്‍ നിന്ന് കേവലം ഒന്‍പത് മിനിറ്റ് മാത്രമാണ് കോണ്‍ഗ്രസ് പുറത്തുവിട്ടതെന്നും ബാക്കി 95 ശതമാനം ചര്‍ച്ചകളും മറച്ചുവെച്ചുവെന്നും ബ്രിട്ടാസ് ചൂണ്ടിക്കാട്ടി. പിണറായി വിജയനെ ആലിംഗനം ചെയ്യാനാകില്ലെന്ന രാഹുല്‍ ഗാന്ധിയുടെ പരാമര്‍ശത്തിന്, മോദിയെ ആലിംഗനം ചെയ്തത് ഓര്‍മ്മിപ്പിച്ച് അദ്ദേഹം മറുപടി നല്‍കി.

🔹ഗുരുവായൂരിലെ സ്വകാര്യ ലോഡ്ജില്‍ പൊലീസുകാരനെ തൂങ്ങിമരിച്ച നിലയില്‍ കണ്ടെത്തി. ആലപ്പുഴ സൗത്ത് പൊലീസ് സ്റ്റേഷനിലെ നര്‍ക്കോട്ടിക് സെല്‍ എഎസ്‌ഐ ആലപ്പുഴ മാരാരിക്കുളം സ്വദേശി 52 വയസ്സുള്ള ശാന്തകുമാറിനെയാണ് കിഴക്കേ നടയിലെ സ്വകാര്യ ലോഡ്ജില്‍ മരിച്ച നിലയില്‍ കണ്ടെത്തിയത്.

🔹തിരുവനന്തപുരം മുന്‍ മേയര്‍ ആര്യാ രാജേന്ദ്രനുമായ റോഡില്‍ തര്‍ക്കമുണ്ടാക്കിയ ഡ്രൈവര്‍ യദുവിന് നിയമസഭയില്‍ താല്‍ക്കാലിക ഡ്രൈവറായി നിയമനം നല്‍കി. യദുവിന് നിയമനം നല്‍കണമെന്നാവശ്യപ്പെട്ട് പുതുപ്പള്ളി എംഎല്‍എ ചാണ്ടി ഉമ്മന്‍ സ്പീക്കര്‍ തിരുവഞ്ചൂര്‍ രാധാകൃഷ്ണന് കത്ത് നല്‍കിയിരുന്നു. വിവാദങ്ങള്‍ക്ക് പിന്നാലെ, യദു ആര്യാ രാജേന്ദ്രനെതിരെ പൊലീസില്‍ പരാതി നല്‍കുകയും കെഎസ്ആര്‍ടിസി ഇയാളെ പുറത്താക്കുകയും ചെയ്തിരുന്നു.

🔹ബൈക്ക് ഡിവൈഡറിലിടിച്ച് മറിഞ്ഞു മൈസൂരുവില്‍നിന്ന് ബെംഗളൂരുവിലേക്ക് വരികയായിരുന്ന 2 മലയാളി നഴ്‌സിങ് വിദ്യാര്‍ഥികള്‍ മരിച്ചു. എറണാകുളം മുളന്തുരുത്തി പെരുമ്പള്ളി എരുമേലില്‍ വീട്ടില്‍ ഗീരിഷ്‌കുമാറിന്റെ മകന്‍ ഗൗരീശങ്കര്‍ (22), കണ്ണൂര്‍ ശ്രീകണ്ഠാപുരം സ്വദേശി അതുല്‍ (22) എന്നിവരാണ് മരിച്ചത്.

🔹നീറ്റ് ചോദ്യപേപ്പര്‍ ചോര്‍ച്ചയുമായി ബന്ധപ്പെട്ട് ബംഗളൂരുവില്‍ ഇന്ന് കോക്‌റോച്ച് ജനത പാര്‍ട്ടി പ്രതിഷേധം. ഫ്രീഡം പാര്‍ക്കില്‍ വൈകിട്ട് 4 മുതല്‍ 6 വരെയാണ് പ്രതിഷേധം സംഘടിപ്പിക്കുന്നത്. കേന്ദ്ര വിദ്യാഭ്യാസ മന്ത്രിയുടെ രാജി ആവശ്യപ്പെട്ടാണ് പ്രതിഷേധം.

🔹ലഫ്റ്റനന്റ് ജനറല്‍ ധീരജ് സേത്ത് പുതിയ കരസേന മേധാവിയായി നിയമിതനായി. നിലവില്‍ കരസേന ഉപമേധാവിയായി സേവനമനുഷ്ഠിക്കുന്ന അദ്ദേഹം 2026 ജൂണ്‍ 30-ന് ഉച്ചയ്ക്ക് ശേഷമാണ് പുതിയ ചുമതലയേല്‍ക്കുന്നത്.

🔹ഇടിമിന്നലേറ്റതിനെ തുടര്‍ന്ന് ശ്രീലങ്കയില്‍നിന്ന് ഓസ്ട്രേലിയയിലെ സിഡ്നിയിലേക്ക് പറക്കുകയായിരുന്ന ശ്രീലങ്കന്‍ എയര്‍ലൈന്‍സ് വിമാനം യാത്രാമധ്യേ അടിയന്തരമായി തിരിച്ചിറക്കി. 207 യാത്രക്കാരും 16 ജീവനക്കാരുമാണ് വിമാനത്തിലുണ്ടായിരുന്നത്.

🔹ഇറാനുമായുള്ള സമാധാന കരാറില്‍ ഇന്ന് ഒപ്പിടുമെന്ന് യുഎസ് പ്രസിഡന്റ് ഡൊണാള്‍ഡ് ട്രംപ്. കരാര്‍ ഒപ്പിട്ടാലുടന്‍ മാസങ്ങളായി തടസ്സപ്പെട്ടിരിക്കുന്ന ഹോര്‍മുസ് കടലിടുക്ക് എല്ലാവര്‍ക്കുമായി തുറന്നുകൊടുക്കുമെന്നും ട്രംപ് വ്യക്തമാക്കി. അതേസമയം ഞായറാഴ്ച കരാര്‍ ഒപ്പിടുമെന്ന വാര്‍ത്ത ഇറാന്‍ വിദേശകാര്യ മന്ത്രാലയം നിഷേധിച്ചു. വരും ദിവസങ്ങളില്‍ സമാധാന ഉടമ്പടി ഒപ്പിടാനുള്ള സാധ്യത തള്ളിക്കളയാനാവില്ലെങ്കിലും, അത് ഇന്ന് സംഭവിക്കില്ലെന്ന് ഇറാന്‍ വിദേശകാര്യ വക്താവ് ഇസ്മായില്‍ ബഗായ് വ്യക്തമാക്കി. 24 മണിക്കൂറിനുള്ളില്‍ ഇരുരാജ്യങ്ങളും പ്രാഥമിക കരാറില്‍ ഒപ്പിട്ടേക്കുമെന്ന് പാകിസ്താന്‍ പ്രധാനമന്ത്രി ഷഹബാസ് ഷെരീഫും ഇന്നലെ സൂചിപ്പിച്ചിരുന്നു.

🔹യുഎസ് ഭീകര സംഘടനയായി പ്രഖ്യാപിച്ച വെനിസ്വേലന്‍ ക്രിമിനല്‍ സംഘത്തിന്റെ തലവനെ അമേരിക്കന്‍ സൈന്യം വധിച്ചു. ‘ട്രെന്‍ ഡി അരഗ്വ’ എന്ന മാഫിയാ സംഘത്തിന്റെ നേതാവായ ‘നിനോ ഗ്വറേറോ’ എന്നറിയപ്പെടുന്ന ഹെക്ടര്‍ റസ്തന്‍ഫോര്‍ഡ് ഗ്വറേറോ ഫ്‌ലോറസിനെയാണ് അമേരിക്കന്‍ സൈന്യം വധിച്ചത്. വെനിസ്വേലന്‍ സൈന്യത്തിന്റെ സഹായത്തോടെയാണ് ഇയാള്‍ താമസിച്ച വീടിനു നേര്‍ക്ക് ആക്രമണം നടത്തിയതെന്ന് പ്രസിഡന്റ് ട്രംപ് സോഷ്യല്‍ മീഡിയാ പോസ്റ്റിലൂടെ അറിയിച്ചു.

🔹അമേരിക്കയും ഇറാനും തമ്മിലുള്ള യുദ്ധം അവസാനിപ്പിക്കുന്നതിനുള്ള സമാധാന കരാര്‍ 24 മണിക്കൂറിനുള്ളില്‍ ഒപ്പുവെക്കുമെന്ന് പാക് പ്രധാനമന്ത്രി ഷഹബാസ് ഷരീഫ്. പാകിസ്ഥാന്‍ മധ്യസ്ഥത വഹിക്കുന്ന ചര്‍ച്ചകളില്‍, ഹോര്‍മുസ് കടലിടുക്ക് തുറക്കുന്നതിനും ഉപരോധങ്ങള്‍ പിന്‍വലിക്കുന്നതിനും ധാരണയായിട്ടുണ്ട്. എന്നാല്‍, ഇസ്രായേല്‍ ഈ കരാറിന്റെ ഭാഗമാകില്ലെന്ന് വ്യക്തമാക്കിയിട്ടുണ്ട്.

🔹അമേരിക്കന്‍-ഇസ്രയേല്‍ ആക്രമണത്തില്‍ കൊല്ലപ്പെട്ട ഇറാന്‍ പരമോന്നത നേതാവ് ആയത്തുള്ള അലി ഖമനേയിയുടെ സംസ്‌കാരം ജൂലൈ 9 ന് നടക്കും. കൊല്ലപ്പെട്ട് 106 ദിവസങ്ങള്‍ക്ക് ശേഷമാണ് പ്രഖ്യാപനം. സംസ്‌കാരത്തിന് മുന്നോടിയായി രാജ്യത്ത് മൂന്ന് ദിവസത്തെ വിലാപയാത്രയും സംഘടിപ്പിക്കും.

🔹മഴമൂലം 25 ഓവറാക്കി ചുരുക്കിയ ഇന്ത്യ – അഫ്ഗാനിസ്താന്‍ ഏകദിന പരമ്പരയിലെ ആദ്യമത്സരത്തില്‍ ഇന്ത്യക്ക് 7 വിക്കറ്റിന്റെ വിജയം. ടോസ് നഷ്ടപ്പെട്ട് ആദ്യം ബാറ്റുചെയ്ത അഫ്ഗാന്‍ 24.5 ഓവറില്‍ 194 റണ്‍സിന് പുറത്തായി. 51 പന്തില്‍ 102 റണ്‍സെടുത്ത റഹ്‌മാനുള്ള ഗുര്‍ബാസിന്റെ ഇന്നിംഗ്സാണ് അഫ്ഗാന് മികച്ച സ്‌കോര്‍ സമ്മാനിച്ചത്. മറുപടി ബാറ്റിങ്ങിനിറങ്ങിയ ഇന്ത്യ 66 പന്തില്‍ പുറത്താകാതെ 84 റണ്‍സെടുത്ത ശുഭ്മാന്‍ ഗില്ലിന്റെ മികവില്‍ 22.5ഓവറില്‍ ലക്ഷ്യം മറികടന്നു.

🔹ലോകകപ്പ് ഫുട്ബോള്‍ ഗ്രൂപ്പ് ബിയില്‍ കരുത്തരായ സ്വിറ്റ്സര്‍ലന്‍ഡിനെതിരെ അവസാന നിമിഷം സമനില പിടിച്ച് ഖത്തര്‍. ഒന്നാം പകുതിയില്‍ ഒരു ഗോളിന് പിന്നിലായിരുന്ന ഖത്തര്‍ ഇഞ്ചുറി ടൈമിന്റെ നാലാം മിനിറ്റിലാണ് സമനില ഗോള്‍ നേടിയത്. ലോകകപ്പ് ചരിത്രത്തില്‍ ഖത്തറിന് ആദ്യ പോയിന്റ് നേടിക്കൊടുത്ത ഗോളടിച്ചത് ക്യാപ്റ്റന്‍ ബൗലെം ഖൗഖിയാണ്. രണ്ടാം ലോകകപ്പ് കളിക്കുന്ന ഖത്തറിന് ഇതുവരെ കളിച്ച നാലു കളികളില്‍ മൂന്നിലും തോല്‍വിയായിരുന്നു ഫലം. പതിനേഴാം മിനിറ്റില്‍ ബ്രീല്‍ എംബോളോയുടെ പെനാല്‍റ്റി ഗോളിലൂടെയാണ് സ്വിറ്റ്സര്‍ലന്‍ഡ് ലീഡ് നേടിയത്.

🔹ലോകകപ്പ് ഫുട്‌ബോളിന്റെ ഗ്രൂപ്പ് സിയില്‍ മുന്‍ചാമ്പ്യന്മാരായ ബ്രസീലിനെ സമനിലയില്‍ തളച്ച് മൊറോക്കോ. ഇരുപത്തിയൊന്നാം മിനിറ്റില്‍ ഇസ്മയില്‍ സൈബാരിയിലൂടെ ഗോള്‍ നേടിയാണ് മൊറോക്കോ ബ്രസീലിനെ ഞെട്ടിച്ചത്. എന്നാല്‍ 32ാം മിനിറ്റില്‍ ഒരു ഇടതുപാര്‍ശ്വത്തിലൂടെ ചാട്ടൂളിപോലെ ഓടിയിറങ്ങിയ ബ്രീലിന്റെ വിനീഷ്യസ് ഒരു ക്ലാസിക് ഗോളിലൂടെ തിരിച്ചടിച്ചെങ്കിലും ലോകമെമ്പാടുമുള്ള ആരാധകര്‍ക്ക് ഹൃദയമിടിപ്പേറ്റിയ നിമിഷങ്ങള്‍ സമ്മാനിച്ച മത്സരത്തില്‍ മൊറോക്കോയോട് സമനിലയുമായി രക്ഷപ്പെടുകയായിരുന്നു മുന്‍ ചാമ്പ്യന്‍മാരായ ബ്രസീല്‍.

🔹ഐശ്വര്യ രാജേഷ്-തിരു വീര്‍ ചിത്രം ‘ഓ സുകുമാരി’ ടീസര്‍ പുറത്ത്. ചിത്രം രചിച്ചു സംവിധാനം ചെയ്തിരിക്കുന്നത് നവാഗതനായ ഭരത് ദര്‍ശന്‍ ആണ്. ബ്ലോക്ക്ബസ്റ്റര്‍ ഹിറ്റായ ‘പ്രീ വെഡ്ഡിംഗ് ഷോ’ക്ക് ശേഷം യുവതാരം തിരു വീര്‍ നായകനാകുന്ന ചിത്രമാണിത്. കോമഡി, പ്രണയം, ഫാന്റസി എന്നിവ കോര്‍ത്തിണക്കിയാണ് ചിത്രം ഒരുക്കിയിരിക്കുന്നത് എന്ന സൂചനയാണ് ടീസര്‍ നല്‍കുന്നത്. ടൈറ്റില്‍ കഥാപാത്രമായി ഐശ്വര്യ രാജേഷ് എത്തുന്ന ചിത്രത്തില്‍, യാദഗിരി എന്ന കഥാപാത്രമാണ് തിരുവീര്‍ വേഷമിടുന്നത്. ദാമിനി എന്നാണ് ഐശ്വര്യയുടെ കഥാപാത്രത്തിന്റെ പേര്. ഗ്രാമീണ പശ്ചാത്തലത്തില്‍ കഥ പറയുന്ന ഒരു റൊമാന്റിക് കോമഡി ആയാണ് ഈ ചിത്രം ഒരുക്കിയിരിക്കുന്നത്. മുരളിധര്‍ ഗൌഡ്, വിഷ്ണു ഓയി (മാഡ് ഫെയിം) ഝാന്‍സി, അമാനി, ആനന്ദ്‌കോട്ട ജയറാം എന്നിവരാണ് ചിത്രത്തിലെ മറ്റു താരങ്ങള്‍. തെലുങ്ക്, കന്നഡ, തമിഴ്, മലയാളം, ഹിന്ദി ഭാഷകളില്‍ ചിത്രം റിലീസ് ചെയ്യും.

🔹മലയാള സിനിമയിലെ ക്ലാസിക് ക്രിമിനല്‍ ജോര്‍ജുകുട്ടിയുടെ മൂന്നാംവരവ് ഇനി ഒടിടിയില്‍ കാണാം. മോഹന്‍ലാലിനെ നായകനാക്കി ജീത്തു ജോസഫ് സംവിധാനംചെയ്ത ‘ദൃശ്യം 3’ ഒടിടി സ്ട്രീമിങ് പ്രഖ്യാപിച്ചു. ചിത്രം ജൂണ്‍ 18-ന് ഒടിടിയിലെത്തും. ആമസോണ്‍ പ്രൈം വീഡിയോയിലാണ് സ്ട്രീമിങ്. മലയാളത്തിന് പുറമേ, തെലുങ്ക്, തമിഴ്, കന്നഡ ഭാഷകളിലും ചിത്രം ലഭ്യമാവും. തിയേറ്റര്‍ കളക്ഷന് പുറമേ, ഒടിടി- സാറ്റ്ലൈറ്റ് ബിസിനസ് ഉള്‍പ്പെടെ ചിത്രം 300 കോടി നേടിയിരുന്നു. റിലീസ് ചെയ്ത് 58 മണിക്കൂര്‍ കൊണ്ടാണ് ചിത്രം 100 കോടി കളക്ഷന്‍ പിന്നിട്ടത്. ഏഴുദിവസംകൊണ്ട് 200 കോടി ക്ലബ്ബിലും ചിത്രം കയറി. ജീത്തു ജോസഫ് തിരക്കഥയെഴുതി സംവിധാനം ചെയ്ത ചിത്രത്തില്‍ മോഹന്‍ലാലിനൊപ്പം മീന, സിദ്ധിഖ്, മുരളി ഗോപി, എസ്തര്‍ അനില്‍, അന്‍സിബ തുടങ്ങിയവര്‍ പ്രധാനവേഷങ്ങള്‍ അവതരിപ്പിച്ചു.

💦 ഗുരുജിയുടെ വാക്കുകൾ
*****************************

ജീവിതത്തിൽ നാം തനിച്ചായി പോകുന്ന ചില ഒറ്റയടി പാതകളുണ്ട്…
ഇരു വശങ്ങളിലും ഒരു കൂട്ടം ആളുകളുണ്ടായിട്ടും, കൈ പിടിക്കാനാളില്ലാതെ
തളർന്നു പോകുന്ന ചില നിമിഷങ്ങളിൽ.., തീർത്തും തനിച്ചായി പോകുന്ന ചിലയിടങ്ങൾ… കൂട്ടിനുണ്ടെന്ന് പറഞ്ഞവരൊക്കെ കൂട്ടം തെറ്റി പോകുന്ന
അവസ്ഥകൾ …
കൈ വിടില്ലെന്ന് ശപഥം ചെയ്തവർ കണ്ണെത്താ ദൂരത്തേക്ക് അകന്ന്
പോകുന്ന കാഴ്ചകൾ…
അലമുറയിട്ട് കരഞ്ഞാലും അടുത്തുണ്ടെന്ന് പറഞ്ഞവർ പോലും, കേൾക്കാതെ പോകുന്ന നിമിഷങ്ങൾ…
പരസ്പരമറിഞ്ഞിട്ടും, അറിയില്ലെന്ന മുഖം മൂടിയിൽ മുഖമൊളിപ്പിച്ച്‌,
അകലം കാണിക്കുന്നവർ…
ആരവങ്ങൾക്കിടയിലും ആശ്വസിക്കാൻ ഒരു തരി പ്രതീക്ഷകൾ ഇല്ലാതെ,
അനാഥരായി പോകുന്ന സന്ദർഭങ്ങൾ…!!
എങ്കിലും, ..
പ്രതീക്ഷകളും പ്രത്യാശകളുമാണ് നമ്മെ വീണ്ടും ജീവിക്കാൻ പ്രേരിപ്പിക്കുന്നത്.

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ

•എല്ലാ വർഷവും ജൂൺ 14 ലോകമെമ്പാടും ലോക രക്തദാന ദിനമായി (World Blood Donor Day) ആചരിക്കുന്നു. ലോകാരോഗ്യ സംഘടനയുടെ (WHO) ആഹ്വാനപ്രകാരം 2004 മുതലാണ് ഈ ദിനാചരണം ആരംഭിച്ചത്.

മനുഷ്യരിൽ ആദ്യമായി രക്തഗ്രൂപ്പുകൾ കണ്ടെത്തിയ നോബൽ സമ്മാന ജേതാവായ ശാസ്ത്രജ്ഞൻ കാൾ ലാൻഡ്‌സ്റ്റെയ്‌നറുടെ (Karl Landsteiner) ജന്മദിനമാണ് ജൂൺ 14. അദ്ദേഹത്തോടുള്ള ആദരസൂചകമായാണ് ഈ ദിവസം രക്തദാന ദിനമായി തിരഞ്ഞെടുത്തത്.സുരക്ഷിതമായ രക്തത്തിന്റെയും രക്തഘടകങ്ങളുടെയും ആവശ്യകതയെക്കുറിച്ച് ജനങ്ങളിൽ ബോധവൽക്കരണം നടത്തുക. പ്രതിഫലം ഇച്ഛിക്കാതെ രക്തം നൽകി ജീവൻ രക്ഷിക്കുന്ന ദാതാക്കളെ അഭിനന്ദിക്കുക എന്നിവയാണ് ഈ ദിനത്തിന്റെ പ്രധാന ലക്ഷ്യങ്ങൾ.18-നും 65-നും ഇടയിൽ പ്രായവും, 45 കിലോഗ്രാമിൽ കൂടുതൽ ശരീരഭാരവുമുള്ള ആരോഗ്യവാനായ ഏതൊരാൾക്കും രക്തം ദാനം ചെയ്യാം.

•ദേശീയ പതാക ദിനം (Flag Day – USA): അമേരിക്കയിൽ ജൂൺ 14 ദേശീയ പതാക ദിനമായി ആചരിക്കുന്നു. 1777 ജൂൺ 14-നാണ് അമേരിക്ക അവരുടെ ഔദ്യോഗിക പതാക സ്വീകരിച്ചത്.

•അന്താരാഷ്ട്ര ബാത്ത് ദിനം (International Bath Day): ശുചിത്വത്തിന്റെ പ്രാധാന്യം ഓർമ്മിപ്പിക്കുന്ന ഒരു ദിനമായും ഇത് ചിലയിടങ്ങളിൽ ആചരിക്കപ്പെടുന്നു.

തയ്യാറാക്കിയത്: കപിൽ ശങ്കർ

9 Likes

📱വാർത്തകൾ ഒറ്റനോട്ടത്തിൽ📱 – 2026 | ജൂൺ 14 | ഞായർ ✍️ കപിൽ ശങ്കർ

💦 ഗുരുജിയുടെ വാക്കുകൾ
*****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ

തയ്യാറാക്കിയത്: കപിൽ ശങ്കർ

ഫ്ലോറിഡയിൽ ദുരന്തം, അമിതവേഗവും മദ്യലഹരിയും. മകളുടെ മരണത്തിൽ, മുൻ പാസ്റ്റർക്കെതിരെ കേസ്

📱വാർത്തകൾ ഒറ്റനോട്ടത്തിൽ📱 – 2026 | ജൂലൈ 22 | ബുധൻ ✍️ കപിൽ ശങ്കർ

LEAVE A REPLY Cancel reply

Most Popular

നടുറോഡിൽ യുവതിയുടെ കെെ വെട്ടിമാറ്റിയ രണ്ടാം ഭർത്താവ് അറസ്റ്റിൽ

ജന്തര്‍ മന്തറില്‍ നടക്കുന്ന വിദ്യാര്‍ത്ഥി പ്രതിഷേധത്തില്‍ പ്രതികരിച്ച് ദുൽഖര്‍ സല്‍മാനും, ആസിഫ് അലിയും

Recent Comments

EDITOR PICKS

നടുറോഡിൽ യുവതിയുടെ കെെ വെട്ടിമാറ്റിയ രണ്ടാം ഭർത്താവ് അറസ്റ്റിൽ

ജന്തര്‍ മന്തറില്‍ നടക്കുന്ന വിദ്യാര്‍ത്ഥി പ്രതിഷേധത്തില്‍ പ്രതികരിച്ച് ദുൽഖര്‍ സല്‍മാനും, ആസിഫ് അലിയും

POPULAR POSTS

POPULAR CATEGORY

ABOUT US

FOLLOW US

📱വാർത്തകൾ ഒറ്റനോട്ടത്തിൽ📱 – 2026 | ജൂൺ 14 | ഞായർ ✍️ കപിൽ ശങ്കർ

💦 ഗുരുജിയുടെ വാക്കുകൾ *****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ

തയ്യാറാക്കിയത്: കപിൽ ശങ്കർ

LEAVE A REPLY Cancel reply

Most Popular

Recent Comments

EDITOR PICKS

POPULAR POSTS

POPULAR CATEGORY

ABOUT US

FOLLOW US

💦 ഗുരുജിയുടെ വാക്കുകൾ
*****************************