📱വാർത്തകൾ ഒറ്റനോട്ടത്തിൽ📱 – 2024 | നവംബർ 23 | ശനി ✍ കപിൽ ശങ്കർ

🔹വയനാട് ലോക്‌സഭയില്‍ പ്രിയങ്കാ ഗാന്ധി നേടിയത് ആരും പ്രതീക്ഷിക്കാത്ത ഭൂരിപക്ഷം . വോട്ടിംഗ് ശതമാനം കുറഞ്ഞതോടെ ഭൂരിപക്ഷം കുറയുമെന്ന് പ്രതീക്ഷിച്ചവരെ ഞെട്ടിച്ച് നാലു ലക്ഷത്തിന് മുകളില്‍ അധിക വോട്ട് നേടിയ പ്രിയങ്കയുടെ കരുത്തുള്ള വിജയം. വയനാടിന്റെ മുക്കിലും മൂലയിലും അവര്‍ മുന്നേറി. ഇതിനൊപ്പമാണ് പാലക്കാട്ടെ മിന്നും വിജയം. പന്ത്രണ്ടായിരം വോട്ടിന്റെ ഭൂരിപക്ഷ വിജയമാണ് കോണ്‍ഗ്രസ് പ്രതീക്ഷിച്ചത്. എന്നാല്‍ അതും കടന്ന് പതിനെട്ടായിരത്തിലേക്ക് രാഹുല്‍ മാങ്കൂട്ടത്തിലെത്തി. അങ്ങനെ കെപിസിസിയുടെ യോജിച്ച പ്രവര്‍ത്തനം അവിടെ വിജയിച്ചു. ചേലക്കരയിലെ യുആര് പ്രദീപിന്റെ ക്രിസ്റ്റല്‍ ക്ലിയര്‍ വിജയം മുഖ്യമന്ത്രി പിണറായി വിജയനും സിപിഎമ്മിനും ആശ്വാസമാണ്.

🔹പാലക്കാട് ഉപതെരഞ്ഞെടുപ്പില്‍ യുഡിഎഫ് സ്ഥാനാര്‍ത്ഥി രാഹുല്‍ മാങ്കൂട്ടത്തില്‍ റെക്കോര്‍ഡ് ഭൂരിപക്ഷത്തിലാണ് വിജയിച്ചത്. 18,840 വോട്ടിന്റെ ഭൂരിപക്ഷത്തിലാണ് രാഹുല്‍ മാങ്കൂട്ടത്തില്‍ വിജയമുറപ്പിച്ചിരിക്കുന്നത്. രാഹുല്‍ മാങ്കൂട്ടത്തില്‍ 58,389 നേടിയപ്പോള്‍ രണ്ടാം സ്ഥാനത്തുള്ള എന്‍ഡിഎ സ്ഥാനാര്‍ത്ഥി സി.കൃഷണ്കുമാറിന് 39,549 വോട്ടും മൂന്നാം സ്ഥാനത്തുള്ള പി.സരിന് 37,293 വോട്ടുമാണ് ലഭിച്ചത്. 2021 ലെ നിയമസഭാ തിരഞ്ഞെടുപ്പില്‍ ഷാഫി പറമ്പില്‍ 3829 ന്റെ ഭൂരിപക്ഷത്തിനാണ് എന്‍ഡിഎ സ്ഥാനാര്‍ത്ഥിയായിരുന്ന മെട്രോമാന്‍ ഇ.ശ്രീധരനെ തോല്‍പിച്ചത്. 2016 ലെ നിയമസഭാ തിരഞ്ഞെടുപ്പില്‍ ഷാഫിക്ക് ലഭിച്ച 17,843 വോട്ടിന്റെ ഭൂരിപക്ഷമാണ് പാലക്കാട്ടത്തെ ഇതുവരെയുള്ള മികച്ച ഭൂരിപക്ഷം.

🔹 ചേലക്കര ഉപതെരഞ്ഞെടുപ്പില്‍ എല്‍ഡിഎഫ് സ്ഥാനാര്‍ത്ഥി യു ആര്‍ പ്രദീപ് 12,122 വോട്ടുകളുടെ ഭൂരിപക്ഷത്തിലാണ് വിജയം ഉറപ്പിച്ചത്. പോസ്റ്റല്‍ വോട്ടുകള്‍ എണ്ണി തുടങ്ങിയപ്പോള്‍ മുതല്‍ യുഡിഎഫ് സ്ഥാനാര്‍ത്ഥി രമ്യ ഹരിദാസിനെ അപ്രസക്തയാക്കി കൊണ്ടായിരുന്നു പ്രദീപിന്റെ മുന്നേറ്റം. യു ആര്‍ പ്രദീപ് 64,259 വോട്ട് നേടിയപ്പോള്‍ യുഡിഎഫിന്റെ രമ്യാ ഹരിദാസിന് 52,137 വോട്ടും എന്‍ഡിഎയുടെ കെ.ബാലകൃഷ്ണന് 33,354 വോട്ടും ലഭിച്ചു. ചേലക്കരയില്‍ 3920 വോട്ട് മാത്രം നേടിയ പി വി അന്‍വറിന്റെ സ്ഥാനാര്‍ത്ഥിയായ എന്‍.കെ.സുധീറിന് കാര്യമായ ചലനമുണ്ടാക്കാന്‍ സാധിച്ചില്ല

🔹 സംസ്ഥാനത്ത് ഭരണവിരുദ്ധ വികാരമുണ്ടെന്നതിന്റെ തെളിവാണ് പാലക്കാട് ഉപതിരഞ്ഞെടുപ്പിലെ വിജയമെന്ന് പ്രതിപക്ഷ നേതാവ് വി.ഡി സതീശന്‍. ഇതിന് മുമ്പ് നടന്ന ഉപതിരഞ്ഞെടുപ്പുകളിലും യുഡിഎഫിന് ഇരട്ടിയിലധികം വോട്ടുകളാണ് ലഭിച്ചത്. എന്നിട്ടും ഭരണവിരുദ്ധ വികാരമില്ല എന്നാണ് സിപിഎം വിശ്വസിക്കുന്നത്. അങ്ങനെ തന്നെ അവര്‍ വിശ്വസിക്കണമെന്നാണ് ഞങ്ങള്‍ ആഗ്രഹിക്കുന്നതെന്നും വി.ഡി സതീശന്‍ പറഞ്ഞു.

🔹മഹാരാഷ്ട്രയില്‍ കാവിതരംഗം ആഞ്ഞടിച്ച നിയമസഭാ തെരഞ്ഞെടുപ്പില്‍ ബിജെപി സഖ്യമായ മഹായുതി മൂന്നില്‍ രണ്ട് ഭൂരിപക്ഷത്തോടെ അധികാരത്തുടര്‍ച്ചയിലേക്ക്. ഒടുവില്‍ വിവരങ്ങള്‍ പുറത്തുവരുമ്പോള്‍ 231 സീറ്റില്‍ മഹായുതി സഖ്യം മുന്നേറുന്നു. സമസ്ത മേഖലയിലും ബിജെപി സഖ്യം കടന്നുകയറി. ഉദ്ധവ് വിഭാഗം ശിവസേനയുടെയും എന്‍സിപി (ശരദ് പവാര്‍), കോണ്‍ഗ്രസ് ശക്തികേന്ദ്രങ്ങളില്‍ പോലും ഞെട്ടിക്കുന്ന മുന്നേറ്റമാണ് ബിജെപിയും സഖ്യകക്ഷികളും നടത്തിയത്. കോണ്‍ഗ്രസ് സഖ്യമായ മഹാവികാസ് അഘാഡി സഖ്യം വെറും 51 സീറ്റിലേക്ക് ചുരുങ്ങുന്നുവെന്നാണ് ഒടുവില്‍ പുറത്തുവരുന്ന വിവരങ്ങള്‍. ബിജെപിയാണ് ഏറ്റവും കൂടുതല്‍ നേട്ടമുണ്ടാക്കിയത്. മത്സരിച്ച 148 സീറ്റുകളില്‍ 132 സീറ്റുകളില്‍ ബിജെപി ലീഡ് ചെയ്യുന്നു. എക്‌സിറ്റ് പോളുകള്‍ എന്‍ഡിഎ മുന്നണിയുടെ വിജയം പ്രവചിച്ചെങ്കിലും തൂത്തുവാരല്‍ ആരും പ്രതീക്ഷിച്ചിരുന്നില്ല.

🔹വഖഫ് ഭൂമി പ്രശ്‌നവുമായി ബന്ധപ്പെട്ട് മുനമ്പത്തെ സമരസമിതിയുമായി മുഖ്യമന്ത്രി ചര്‍ച്ച നടത്തും. ഇന്ന് വൈകുന്നേരം നാല് മണിക്ക് ഓണ്‍ലൈനായാണ് ചര്‍ച്ച. വിഷയത്തില്‍ ജുഡീഷ്യല്‍ അന്വേഷണം പ്രഖ്യാപിച്ചതില്‍ സമരക്കാര്‍ പ്രതിഷേധം ഉയര്‍ത്തുന്ന പശ്ചാത്തലത്തിലാണ് മുഖ്യമന്ത്രി ചര്‍ച്ച നടത്തുന്നത്.

🔹വേട്ടയാടലും ഭീഷണിയും തന്നോട് വേണ്ടെന്നും ഇതുവരെ പറയാത്ത കാര്യങ്ങള്‍ തന്നെക്കൊണ്ട് പറയിപ്പിക്കാതിരിക്കുന്നതാണ് നല്ലതെന്നും മന്ത്രി സജി ചെറിയാന്റെ ഫെയ്സ്ബുക്ക് പോസ്റ്റ്. അതൊക്കെ പറഞ്ഞാല്‍ പലരുടെയും യഥാര്‍ഥ മുഖങ്ങള്‍ നാടറിയുമെന്നും സജി ചെറിയാന്‍ ഫെയ്സ്ബുക്കില്‍ കുറിച്ചു. എന്നാല്‍ അരമണിക്കൂറിനുള്ളില്‍ മന്ത്രി ഫെയ്സ്ബുക്ക് പോസ്റ്റ് പിന്‍വലിച്ചു.

🔹പത്തനംതിട്ടയിലെ അമ്മു സജീവന്റെ മരണത്തില്‍ അറസ്റ്റിലായ മൂന്ന് പേരെയും റിമാന്‍ഡ് ചെയ്തു. ഉച്ചയ്ക്കുശേഷം മൂന്നു പ്രതികളെയും കോടതിയില്‍ ഹാജരാക്കിയപ്പോള്‍ പൊലീസ് കസ്റ്റഡിയില്‍ ആവശ്യപ്പെട്ടെങ്കിലും 14 ദിവസത്തേക്ക് പ്രതികളെ റിമാന്‍ഡ് ചെയ്തുകൊണ്ട് കോടതി ഉത്തരവിടുകയായിരുന്നു. പ്രതികളുടെ മൊബൈല്‍ ഫോണില്‍ തെളിവുകളുണ്ടെന്നും ജാമ്യം നല്‍കിയാല്‍ അത് നശിപ്പിക്കപ്പെടുമെന്നും അന്വേഷണ ഉദ്യോഗസ്ഥന്‍ കോടതിയില്‍ വാദിച്ചു. അമ്മുവിന്റെ മരണത്തിലെ ദുരൂഹത നീക്കാന്‍ ഉന്നതതല അന്വേഷണം ആവശ്യപ്പെട്ട് കുടുംബം സര്‍ക്കാരിനെ സമീപിക്കും.

🔹എറണാകുളത്തപ്പന്‍ ഗ്രൗണ്ടിന്റെ ഉടമസ്ഥാവകാശം കൊച്ചിന്‍ ദേവസ്വം ബോര്‍ഡിന് ആണെന്ന കേരള ഹൈക്കോടതിയുടെ ഇടക്കാല ഉത്തരവില്‍ ഇടപെടാന്‍ വിസ്സമ്മതിച്ച് സുപ്രീം കോടതി. ഉടമസ്ഥാവകാശം സംബന്ധിച്ച് ഹൈക്കോടതി അന്തിമ ഉത്തരവ് പുറപ്പടിവിച്ചിട്ടില്ലെന്ന് ജസ്റ്റിസുമാരായ ബേല എം ത്രിവേദി, സതീഷ് ചന്ദ്ര ശര്‍മ്മ എന്നിവര്‍ അടങ്ങിയ ബെഞ്ച് ചൂണ്ടിക്കാട്ടി.

🔹ശബരിമലയിലെ റോപ് വേക്ക് തറക്കല്ലിട്ടാല്‍ 24 മാസം കൊണ്ട് പദ്ധതി പൂര്‍ത്തിയാക്കുമെന്ന് കരാര്‍ കമ്പനി. പദ്ധതിയുടെ ഭാഗമായി ഏറ്റെടുക്കുന്ന വനഭൂമിക്ക് പകരം റവന്യൂ ഭൂമി വിട്ടു നല്‍കിയ ഉത്തരവ് വനംവകുപ്പിന് കൈമാറി. കേന്ദ്രപരിസ്ഥിതി മന്ത്രാലയത്തിന്റെ അനുമതി കൂടി ലഭിച്ചാല്‍ ശബരിമലയില്‍ റോപ് വേ നിര്‍മ്മാണം തുടങ്ങാനാകും. 14 വര്‍ഷം പഴക്കമുള്ള പദ്ധതിയാണ് യാഥാര്‍ത്ഥ്യമാകാനായി കാത്തിരിപ്പ് തുടരുന്നത്.

🔹 കഞ്ചാവുമായി യുവാവ് പിടിയിൽ. സംഭവത്തിൽ കോട്ടയം വേളൂർ സ്വദേശി താരിഫിനെയാണ് കോട്ടയം എക്സൈസ് സംഘം പിടികൂടിയത്. താരിഫിൽ നിന്നും ഒരു കിലോഗ്രം കഞ്ചാവ് എക്സൈസ് സംഘം കണ്ടെടുത്തു. അതേസമയം, ഇയാളുടെ സുഹൃത്തും കഞ്ചാവ് കേസിലെ മറ്റൊരു പ്രതിയുമായ വേളൂർ സ്വദേശി ബാദുഷ ഷാഹുൽ പരിശോധനക്കെത്തിയ എക്സൈസ് സംഘത്തെ കണ്ട് ഓടി രക്ഷപ്പെട്ടു.
അന്യ സംസ്ഥാനങ്ങളിൽ നിന്നടക്കം ഇടനിലക്കാർ വഴി എത്തിക്കുന്ന കഞ്ചാവ് പ്രതി ചെറു പൊതികളിലാക്കി പായ്ക്ക് ചെയ്യുന്നതിനിടെയായിരുന്നു അറസ്റ്റ്. പ്രദേശത്തെ വിദ്യാർഥികൾക്കും യുവാക്കൾക്കും കഞ്ചാവ് വിതരണം ചെയ്യുന്ന സംഘത്തിലെ പ്രധാന കണ്ണികളാണ് താരിഫും ബാദുഷ ഷാഹുലുമെന്ന് എക്സൈസ് ഉദ്യോഗസ്ഥർ പറഞ്ഞു.

🔹ശബരിമല സീസൺ പ്രമാണിച്ച് ജോലിക്കെത്തുന്ന തൊഴിലാളികളെ കേന്ദ്രീകരിച്ച് കഞ്ചാവ് വിൽപന നടത്തുന്ന യുവാവിനെ എക്സൈസ് സംഘം പിടികൂടി. മണിമല കരയിൽ തേക്കനാൽ വീട്ടിൽ ബോബിൻ ജോസിനെയാണ് പൊൻകുന്നം എക്സൈസ് സർക്കിൾ ഇൻസ്പെക്ടറുടെ നേതൃത്വത്തിൽ പിടികൂടിയത്. 32 കാരനായ ബോബിൻ ജോസിൽ നിന്നും 1.5 കിലോഗ്രാം കഞ്ചാവും ഇത് തൂക്കാൻ ഉപയോഗിക്കുന്ന ത്രാസും വലിക്കാൻ ഉപയോഗിക്കുന്ന ഒൻപത് പാക്കറ്റ് ഒസിബി പേപ്പറും എക്സൈസ് സംഘം പിടികൂടി. 3 ഗ്രാം കഞ്ചാവിന് 500 രൂപ നിരക്കിലാണ് ഇയാൾ വിൽപ്പന നടത്തി വന്നിരുന്നത്. 2.5 കിലോഗ്രാം പാക്കറ്റിൽ കൊണ്ടുവന്ന കഞ്ചാവ് ഇയാൾ വാടകയ്ക്ക് എടുത്ത വീട്ടിൽ സൂക്ഷിച്ചിരിക്കുകയായിരുന്നു. കഞ്ചാവ് രഹസ്യമായി പായ്ക്ക് ചെയ്ത് വിൽപ്പനയ്ക്കായി മറ്റുള്ളവരെ ഏൽപ്പിക്കുന്നതാണ് ബോബിൻ്റെ രീതി. ഇയാളുടെ കൂട്ടാളികളെക്കുറിച്ച് അന്വേഷിച്ചു വരുന്നു. ഓൺലൈൻ പണമിടപാട് വഴിയാണ് പ്രതിയായ ബോബൻ കച്ചവടം നടത്തി വന്നിരുന്നത്. ഇൻസ്റ്റഗ്രാമിൽ ഗ്രൂപ്പ് ഉണ്ടാക്കി അതുവഴിയും ഇയാൾ വിപണനം നടത്തി വന്നതായി ചോദ്യം ചെയ്യലിൽ പറഞ്ഞു. മണിമല ഭാഗത്ത് വിതരണത്തിനായി കഞ്ചാവ് എത്തിച്ചിട്ടുണ്ട് എന്ന വിവരത്തിൻ്റെ അടിസ്ഥാനത്തിൽ എക്സൈസ് ഷാഡോ ടീമും ഐബിയും ഇവരെ നിരീക്ഷിക്കുന്നുണ്ടായിരുന്നു. പ്രതിയെ കോടതിയിൽ ഹാജരാക്കുന്നതിനായി എരുമേലി റെയിഞ്ച് ഓഫീസിൽ ഹാജരാക്കി.

🔹കോട്ടയം കാഞ്ഞിരപ്പള്ളിയില്‍ വിരണ്ടോടിയ കാള സ്‌കൂട്ടര്‍ യാത്രികനെ ഇടിച്ചു വീഴ്ത്തി. പൂതക്കുഴിയില്‍ അറവുശാലയില്‍ കൊണ്ടുവന്ന കാള വിരണ്ട് ഓടുകയായിരുന്നു. കൂവപ്പള്ളി സ്വദേശി ആന്റണിയ്ക്ക് (67) ആണ് പരിക്കേറ്റത്.
ഇയാളെ 26-ാം മൈലില്‍ സ്വകാര്യ ആശുപത്രിയില്‍ പ്രവേശിപ്പിച്ചു. ഇയാളുടെ പരുക്ക് ഗുരുതരമല്ല. വെള്ളി രാത്രി എട്ടരയോടെയാണ് സംഭവം. അങ്ങാടിയിലൂടെ കാള വിരണ്ടോടുകയായിരുന്നു. ഉടമയും നാട്ടുകാരും ചേര്‍ന്നു കാളയെ പിന്നീട് പിടിച്ചു കെട്ടി.

🔹കൈക്കൂലി വാങ്ങുന്നതിനിടെ എറണാകുളം അസിസ്റ്റന്റ് ലേബര്‍ കമ്മീഷണര്‍ പിടിയിലായി. ഉത്തര്‍പ്രദേശ് സ്വദേശി അജിത് കുമാറാണ് പിടിയിലായത്. ബി.പി.സി.എല്‍ കമ്പനിയില്‍ ലേബര്‍ തൊഴിലാളികളെ കയറ്റുന്നതുമായി ബന്ധപ്പെട്ടാണ് കൈക്കൂലി വാങ്ങിയത്. കാക്കനാട് ഓലിമുകളിലെ കേന്ദ്ര ഡെപ്യൂട്ടി ചീഫ് ലേബര്‍ കമ്മീഷന്‍ ഓഫീസില്‍ വച്ച് ഇന്നലെ രാവിലെയായിരുന്നു സംഭവം.

🔹മത്സ്യബന്ധന ബോട്ട് നാവിക സേനയുടെ മുങ്ങിക്കപ്പലുമായി കൂട്ടിയിടിച്ച് രണ്ടു പേരെ കാണാതായി. കിഴക്കന്‍ ഗോവ തീരത്തു നിന്ന് 70 നോട്ടിക്കല്‍ മൈല്‍ അകലെയാണ് അപകടമുണ്ടായതെന്ന് കേന്ദ്ര പ്രതിരോധ മന്ത്രാലയം പുറത്തിറക്കിയ ഔദ്യോഗിക പ്രസ്താവനയില്‍ പറയുന്നു. 13 പേരുണ്ടായിരുന്ന മാര്‍ത്തോമ എന്ന മത്സ്യബന്ധന ബോട്ടും ഇന്ത്യന്‍ നാവിക സേനയുടെ സ്‌കോര്‍പിയന്‍ ക്ലാസ് മുങ്ങിക്കപ്പലുമാണ് കൂട്ടിയിടിച്ചത്. തെരച്ചിലില്‍ മത്സ്യബന്ധന ബോട്ടിലുണ്ടായിരുന്ന 11 പേരെ കണ്ടെത്തി രക്ഷിക്കാനായി.

🔹മഹാരാഷ്ട്രയിൽ മൂന്നുവയസുകാരിയായ അനന്തരവളെ കൊലപ്പെടുത്തി മൃതദേഹം കത്തിച്ച കേസില്‍ 38കാരന്‍ അറസ്റ്റില്‍. താനെ ജില്ലയിലെ ഉല്ലാസ്‌നഗറിലാണ് സംഭവം നടന്നത് നടന്നത്. നവംബര്‍ 18 മുതല്‍ കുട്ടിയെ കാണാനില്ലായിരുന്നു. തുടർന്ന് മാതാപിതാക്കള്‍ പരാതിയുമായി പോലീസ് സ്റ്റേഷനിലെത്തിയിരുന്നു. ഇതിന്‍റെ അടിസ്ഥാനത്തിൽ നടത്തിയ തെരച്ചിലിലാണ് കുട്ടിയുടെ കത്തിക്കരിഞ്ഞ ശരീരാവശിഷ്ടങ്ങള്‍ ഒരു പോലീസ് സ്റ്റേഷനടുത്തുള്ള കുറ്റിക്കാട്ടില്‍ നിന്നും കണ്ടെത്തിയത്. പ്രതിയെ അറസ്റ്റ് ചെയ്തതായി ഹില്‍ ലൈന്‍ പോലീസ് അറിയിച്ചു. ഇയാളുടെ അടിയേറ്റാണ് കുട്ടി മരിച്ചതെന്നും ചോദ്യം ചെയ്യലിൽ പ്രതി ഇത് സമ്മതിച്ചതായും പോലീസ് പറഞ്ഞു. തെളിവ് നശിപ്പിക്കാനായി പ്രതി കുട്ടിയുടെ മൃതദേഹം കത്തിയ്ക്കുകയായിരുന്നുവെന്ന് ഹില്‍ ലൈന്‍ പോലീസ് സ്റ്റേഷനിലെ മുതിര്‍ന്ന പോലീസുദ്യോഗസ്ഥനായ അനില്‍ ജഗ്താപ് പറഞ്ഞു.
മനപൂര്‍വ്വം കുട്ടിയെ താന്‍ കൊല്ലാന്‍ ശ്രമിച്ചിട്ടില്ലെന്നും കുട്ടിയോടൊപ്പം കളിച്ചുകൊണ്ടിരിക്കുകയായിരുന്നുവെന്നും തമാശയ്ക്ക് താനൊരു അടി കൊടുത്തപ്പോള്‍ കുട്ടി അടുക്കളയിലെ സ്ലാബിലിടിച്ചു വീണുവെന്നുമാണ് ഇയാള്‍ പോലീസിനോട് പറഞ്ഞു. അടിയുടെ ആഘാതത്തില്‍ കുട്ടി കൊല്ലപ്പെടുകയായിരുന്നുവെന്ന് പോലീസ് വ്യക്തമാക്കി. സംഭവം പുറത്തറിയാതിരിക്കാനാണ് കുട്ടിയുടെ മൃതദേഹം കത്തിച്ചതെന്നും ഇയാൾ പോലീസിനോട് പറഞ്ഞു. അതിന് ശേഷം മൃതദേഹാവശിഷ്ടങ്ങള്‍ കുറ്റിക്കാട്ടിലൊളിപ്പിക്കുകയായിരുന്നു.

🔹ഛത്തീസ്ഗഢിലെ ഏറ്റുമുട്ടലില്‍ 10 മാവോയിസ്റ്റുകളെ വധിച്ചു. സുഖ്മ ജില്ലയിലാണ് ഏറ്റുമുട്ടലുണ്ടായത്. കൊരജഗുഡ, ദന്തേവാഡ, നാഗരാം, ബന്ദാര്‍പദാര്‍ തുടങ്ങിയ സ്ഥലങ്ങളിലാണ് ഏറ്റുമുട്ടലുണ്ടായത്. ഏറ്റുമുട്ടലുണ്ടായ വിവരം ബസ്തര്‍ റേഞ്ച് ഐ.ജി സുന്ദര്‍രാജ് സ്ഥിരീകരിച്ചു. മേഖലയില്‍ മാവോയിസ്റ്റുകള്‍ ഒളിച്ചിരിക്കുന്നുണ്ടെന്ന ഇന്റലിജന്‍സ് വിവരത്തെ തുടര്‍ന്നായിരുന്നു പരിശോധന നടത്തിയത്.

🔹ബോര്‍ഡര്‍-ഗാവസ്‌കര്‍ ട്രോഫിയില്‍ തിരിച്ചടിച്ച് ഇന്ത്യ. ഓസ്‌ട്രേലിയയുമായി ആദ്യ ടെസ്റ്റിന് ഇറങ്ങിയ ഇന്ത്യ ആദ്യ ഇന്നിങ്‌സില്‍ വെറും 150 റണ്‍സിനാണ് പുറത്തായത്. എന്നാല്‍ അതേ ശക്തിയില്‍ തിരിച്ചടിച്ച ഇന്ത്യ ആദ്യദിനം കളിയവസാനിക്കുമ്പോള്‍ വെറും 67 റണ്‍സിന് ഓസ്‌ട്രേലിയയുടെ ഏഴു വിക്കറ്റുകള്‍ വീഴ്ത്തി. 10 ഓവറില്‍ 17 റണ്‍സ് മാത്രം വിട്ടുകൊടുത്ത് നാല് വിക്കറ്റ് എടുത്ത ബുംറ തന്നെയാണ് ഓസ്‌ട്രേലിയയെ തകര്‍ക്കുന്നതിലും മുന്നില്‍നിന്നു നയിച്ചത്.

🔹തെലുങ്കിന്റെ നാഗചൈതന്യ നായകനായി വരാനിരിക്കുന്ന ചിത്രമാണ് ‘തണ്ടേല്‍’. ഒരു യഥാര്‍ഥ സംഭവത്തിന്റെ കഥയാണ് ചിത്രം പ്രമേയമാക്കുന്നതെന്നാണ് റിപ്പോര്‍ട്ട്. ശ്രീകാകുളത്തില്‍ നിന്നുള്ള മത്സ്യത്തൊഴിലാളികളുടെ യഥാര്‍ഥ കഥയാണ് തണ്ടലിന്റേത്. തണ്ടേലിന്റെ ലിറിക്ക് വീഡിയോ പുറത്തുവിട്ടിരിക്കുകയാണ്. ജോലിക്കായി ഗുജറാത്തിലേക്ക് പോകുകയാണ് ഇവര്‍. അറിയാതെ മത്സ്യത്തൊഴിലാളികള്‍ പാക്കിസ്ഥാന്‍ കടലിന്റെ ഭാഗത്തില്‍ എത്തിപ്പെടുന്നു. ജയിലിലാക്കപ്പെട്ട മത്സ്യത്തൊഴിലാളികളുടെ ആ ദുരിത കഥ പരാമര്‍ശിക്കുന്നതാണ് തണ്ടേല്‍ എന്നാണ് റിപ്പോര്‍ട്ട്. ബുജ്ജി എന്ന ഗാനമാണ് പുറത്തുവിട്ടിരിക്കുന്നത്. ജാവേദ് അലിയാണ് ഗാനം പാടിയിരിക്കുന്നത്. നാഗചൈതന്യ നായകനാകുമ്പോള്‍ സായ് പല്ലവിയാണ് ചിത്രത്തില്‍ നായികയാകുന്നത്. സ്വന്തം അവകാശങ്ങള്‍ക്കായി പോരാടുന്ന യുവതിയായ കഥാപാത്രമായിട്ടാണ് സായ് പല്ലവി തണ്ടേലില്‍ നായികയാകുന്നത്. നായകനായ നാഗചൈതന്യക്ക് പ്രതിഫലം ഏഴ് കോടിയായിരിക്കും. സായ് പല്ലവിക്ക് ലഭിക്കുന്ന തുക എത്രയെന്ന് പുറത്തുവിട്ടിട്ടില്ല.

തയ്യാറാക്കിയത്:
കപിൽ ശങ്കർ